တော်ဝင်မိန်းမပျို၏သွေးကလဲ့စား (၁)

အပိုင်း ၁၄၃ /အပိုင္း ၁၄၃

Unicode

အပိုင်း ၁၄၃ - ဖီးနစ်ငှက်ရဲ့ ကျူးရင့်သံ

မုယွမ်ယောင် အမျိုးသမီးကျင်းနောက်ကနေ  လိုက်သွားတော့ လူအများက သူတို့ကို ဝိုင်းဝန်းဂုဏ်ပြုကြသည်။

ဘုရင်ခံကတော်ရဲ့မျက်နှာပေါ်တွင် တောက်ပသော အပြုံးတစ်ခုရှိနေ၏။ ဆုလာဘ်က သူမနဲ့ မသက်ဆိုင်ပေမယ့် ဘုရင်ခံကျန်းကို ဘုရင်မင်းမြတ်က လန်းလင် အပ်နှင်းခဲ့ခြင်းဖြစ်သည်။ လန်းလင်သည် အရာရှိတွေအဖို့ အလွန်လိုလားတောင့်တကြသည့် ဆုလာဘ်ဖြစ်သည်။ ပိုအရေးကြီးသည်က ဘုရင်ခံကျန်းသည် ဤဆုလာဘ်ကို ဘာမှမလုပ်ဘဲ ရသွားခြင်းဖြစ်သည်။ သူမ ဘယ်လိုလုပ် မပျော်ပဲနေမလဲ။

(လန်းလင်က ချင်မင်းဆက်တုန်းက အရာရှိခေါင်းဆောင်းတွေပေါ်မှာထိုးရတဲ့ အဆင်တန်ဆာပါ။ ခါငှက်မွှေးနဲ့လုပ်ထားပါတယ်။ အပြာရောင်မလို့ လန်းလင်လို့ခေါ်တာပါ)

လူအများက အမျိုးသမီးကျင်းကိုလည်း ဝိုင်းဝန်းဂုဏ်ပြုကြသည်။ ဧကရာဇ်သည် သူမကို အဆင့်ကိုးဂုဏ်ပုဒ် အပ်နှင်းပြီး ထိုလူတွေ ဘယ်လောက်ပဲ မနာလိုအားကျကြပါစေ စိတ်ရင်းနဲ့ သူမကို ဂုဏ်ပြုကြရသည်။ ဘုရင်ခံကတော်က လူတိုင်း နေရာထိုင်ဖို့ မစီစဉ်ခင်ထိ သာယာနာပျော်ဖွယ်စကားတွေ ဖလှယ်နေလိုက်ကြတာ နှစ်နာရီကျော် ကြာသွားခဲ့သည်။

မုယွမ်ယောင်၏ထိုင်ခုံသည် အမျိုးသမီးကျင်းဘေးတွင် ဖြစ်ပြီး လူအများက စကားပြောကြရင်း သူမကို ပြုံးပြ၊ခေါင်းညိတ်ပြကြသည်။

မုယွမ်ယောင်မျက်နှာတွင် ပျော်ရွှင်မှု ၇၀ရာခိုင်နှုန်းနှင့် ကြောက်ရွံ့မှု ၃၀ရာခိုင်နှုန်း ရှိနေသည်။ ပွဲအစမှအဆုံးထိ သူမသည် အပြုံးတစ်ခုနှင့်သာ ပြန်နှုတ်ဆက်နေခဲ့တာကြောင့် ဘေးက အမျိုးသမီးကျင်းလည်း သဘောတကျနဲ့ သက်ပြင်းသာချနိုင်သည်။ ဒီကောင်မလေးက ကြောက်ဖို့ကောင်းလောက်အောင်ထိ အလွန်အင်မတန် ဉာဏ်ကောင်းတယ်။ သူမ ဘုရင်မင်းမြတ်ရဲ့ ဆုလာဘ်ကို လက်ခံရရှိပြီးတာနဲ့ အချိုးပြောင်းသွားမှာ စိုးရိမ်နေခဲ့သည်။ ကြည့်ရတာ ဘာမှမဟုတ်တာကို စိတ်ပူနေခဲ့မိပုံပဲ။