မင်းနဲ့တွေ့ဆုံခွင့် မင္းနဲ႔ေတြ့ဆံုခြင့္

အခန်း (၄၄)

Unicode - လျော်ကြေးငွေ

မနက်ဖြန်တွင် အားလုံး အလုပ်လုပ်ကြရဦးမည်ဖြစ်၍ Cheng Xi နှင့် Cai Yi တို့လည်း ညစာစားပြီးသည့်အခါ လမ်းခွဲလိုက်ကြပြီး ကိုယ့်နေရာအသီးသီးသို့ အလျှိုလျှိုပြန်သွားကြတော့သည်။

အားလုံးပြန်သွားကြပြီးနောက်တွင် Cheng Xi ကားငှားစီးရန်အတွက် လမ်းနံဘေးတွင် ရပ်လိုက်သည်။ သို့သော် မကြာခင်မှာပင် လူတစ်ယောက်က သူမ ညာဘက်ပခုံးကိုလာပုတ်သဖြင့် Cheng Xi က ဘယ်ဘက်သို့ အလိုလိုလှည့်ကြည့်မိသွားသည်။

ထင်ထားသည့်အတိုင်းပင် သူမထက် အနည်းငယ် နောက်ရောက်သည့်နေရာ၊ ဘယ်ဘက်ခြမ်းတွင် Lin Fan က မတ်တတ်ရပ်နေခြင်းဖြစ်သည်။ Cheng Xi နောက်လှည့်လာသည်ကိုတွေ့သည့်အခါ သူ့မျက်နှာပေါ်တွင် အပြုံးတို့ဖြစ်ပေါ်လာသည်။ "ဟ၊ ငါကတော့ နင့်ကို ဘယ်လိုမှ လှည့်စားလို့မရဘူးပဲ။"

ဤကစားနည်းက သူမတို့နှစ်ယောက်ငယ်စဉ်က ကစားဖြစ်ခဲ့ကြသည့်နည်းပင် ဖြစ်သည်။ အချိန်အခိုက်အတန့် တစ်ခုကြာအောင် အတန်းထဲတွင် Lin Fan က Cheng Xi နောက်တွင် ထိုင်ဖြစ်ခဲ့သည်။ နှစ်ယောက်လုံးက ပြတင်းပေါက်နားတွင် နေရာယူထားခြင်းဖြစ်၍ Cheng Xi က အတန်းချိန်ပြီးလျှင် အဝေးသို့လှမ်းငေးကြည့်ရင်း အပန်းဖြေလေ့ရှိသည်။ ထိုသို့ သူမ ငေးနေသည်ကို တွေ့သည့်အခါတိုင်း Lin Fan က ညာဘက်တွင်နေကာ သူမ ဘယ်ဘက်ပခုံးကိုပုတ်သည်၊ သို့မဟုတ် ဘယ်ဘက်တွင်နေကာ သူမ ညာဘက်ပခုံးကို ပုတ်လေ့ရှိသည်။

သို့သော် Cheng Xi က သူ့လှည့်ကွက်ထဲသို့ မည်သည့်အခါကမှပင် ကျရှုံးသွားသည်ဟူ၍မရှိဘဲ အကြိမ်တိုင်းတွင် မှန်သည့်ဘက်ကိုသာ ရွေးချယ်သွားစမြဲဖြစ်သည်။ Cheng Xi က  သူ၏ ကလေးကလားဆန်ပုံကိုတွေ့သည့်အခါ ရယ်ရင်း "နင် ထပ်စမ်းကြည့်မလား။"

ဤသို့ဖြင့် Lin Fan က သူရပ်နေခဲ့သည့်နေရာသို့ နောက်ပြန်ဆုတ်ကာ သူမ ပခုံးကို နောက်တစ်ကြိမ်ထပ်ပုတ်သည်။ Cheng Xi နောက်လှည့်ကြည့်အခါ မည်သူ့ကိုမှ မတွေ့ရသဖြင့် နောက်တစ်ဖက်သို့လှည့်လိုက်ပြီး အံ့ဩတကြီးဖြစ်နေဟန်ဖြင့် ပြောတော့သည်။ "ဟယ်၊ နင်ကိုး!"

သူမ သရုပ်ဆောင်နေပုံက အလွန်အမင်း ချဲ့ကားလုပ်ထားခြင်းဖြစ်၍ Lin Fan လည်း မအောင့်နိုင်တော့ဘဲ ရယ်သွားသကဲ့သို့ Cheng Xi လည်း ရယ်တော့သည်။