Hedgehog And Tiger [Myanmar Translation]

|15|

[Unicode]

ယန်ထန်က လူသုံးယောက်ဝိတ်ကိုသယ်လာရတာ၊ ထဖို့တောင်ရုန်းကုန်နေရတယ်။
ဟယ်ရှင်းချွမ်ရင်ဘတ်ကို ခပ်ဖွဖွပုတ်ရင်း၊ ဘေးလူနှစ်ယောက်ကိုလှမ်းပြောတယ်။
"မင်းတို့တောင်အောက်ဆင်းပြီး ဆရာမကိုပြောပြလိုက်၊ ပြီးရင် လူနာတင်ယာဉ်ပါခေါ်ခိုင်းခဲ့"

ချင်ရှန်းရှန်းက ကြောက်ရွံ့မှုတစ်ချို့ဖြင့် ယန်ထန်ကိုကြည့်လာကာ
"ဒါပေမဲ့...ဒါပေမဲ့ ဆရာမကငါတို့ကိုဆူမှာပေါ့..."

"မင်းကိုဆူတာက လူ့အသက်ထက်ပိုအရေးကြီးနေလား!? မင်းဦးနှောက်တွေရေဝင်ကုန်ပြီလားကွ!?"

အော်သံက ကျယ်လောင်လွန်းတယ်၊ လမ်းပျောက်နေတဲ့ဝမ်ဘင်းဘင်းနဲ့ ရှုပမ်းတို့ကိုပါရောက်လာစေတယ်။
ရှုပမ်းက မြင်ကွင်းကြောင့်လန့်ဖြန့်သွားရပြီး၊ အလျင်စလိုဝင်ပြောလာတယ်
"ငါ တောင်အောက်အမြန်ပြေးဆင်းသွားလိုက်မယ်၊ လူနာတင်ယာဉ်ပါခေါ်ခဲ့မယ် မင်းတို့စောင့်နေဦး"

ထို့နောက် အမြန်ပြေးထွက်သွားတယ်၊ အလျင်လိုမှုတွေကြောင့် ကျောက်တုံးအချို့ကိုတောင်ခလုတ်တိုက်သွားသေး။

ဝမ်ဘင်းဘင်းကရှေ့တိုးလာတယ်။
ဟယ်ရှင်းချွမ်အင်္ကျီကြယ်သီးတွေကိုဖြုတ်ကာ၊ သူ့ရင်ဘတ်ကိုကြည့်ရင်း
"အသက်ရှူနေသေးတယ်၊ သူအသက်ရှူနေတုန်းပဲ"

ယန်ထန်ဟာ အခုမှပဲသက်ပြင်းချလိုက်နိုင်ပြီး
"မင်း သူတို့ကိုတောင်အောက်အရင်ခေါ်သွားလိုက်၊ ရှုပမ်းတစ်ယောက်တည်းဆို ကိစ္စတွေမရှင်းဖြစ်နေဦးမယ်"

"ဟုတ်ပြီ၊ ငါမကြာခင်ပြန်လာခဲ့မယ်"

ဟယ်ရှင်းချွမ်မျက်မှန်က ရေကန်ထဲကျသွားတယ်။
အခုအချိန်မှာ သူကမျက်လုံးတွေပိတ်ထားပြီး၊ ရေစိုစိုဆံပင်တွေကတော့ နှဖူးပေါ်ကပ်တင်လို့နေတယ်။

ယန်ထန်က ဟယ်ရှင်းချွမ်ရဲ့အင်္ကျီအစိုကိုချွတ်ပေးလိုက်ပြီး၊ ကမ်းပေါ်ချွတ်ထားခဲ့တဲ့သူ့အင်္ကျီတွေနဲ့ လဲပေးလိုက်တယ်။

အခုမှ နွေဦးရာသီအစပဲရှိ​သေးတာ၊ ရာသီဥတုကအေးနေတုန်းပဲ။

ဟယ်ရှင်းချွမ်က အနည်းငယ်တုန်ယင်နေတယ်၊ ဒါပေမဲ့ ယန်ထန့်အင်္ကျီနဲ့လဲပေးပြီးချိန်မှာတော့ သက်သာသွားပုံရတယ်။