Hedgehog And Tiger [Myanmar Translation]

|54|

[Unicode]

ခရီးစဉ်ဟာ ဘယ်နေရာမှာပြီးဆုံးသွားခဲ့မှန်းကို ဟယ်ရှင်းချွမ်မသိလိုက်ရဘူး။

ယန်ထန့်အနောက်ကို ဖက်တွယ်ထားရင်း၊ ပြင်းထန်လှတဲ့လေတိုးမှုတွေကိုပဲ ခံစားနေရတယ်။
ဒါပေမဲ့ သူသိပ်မခံလိုက်ရပါဘူး၊ ယန်ထန်က ကာထားပေးလို့လေ။

ကျောပြင်ကျယ်ကျယ်ကိုမှီခိုရင်း၊ တိုးလျလွန်းတဲ့နှလုံးခုန်သံကို လိုက်ဖမ်းဆုပ်နေမိတယ်။

ဆိုင်ကယ်က ရှင်းလင်းနေတဲ့လမ်းမရဲ့ဘေးတစ်နေရာမှာရပ်တန့်လို့သွားတယ်။
ယန်ထန်က ဆိုင်ကယ်ဦးထုပ်ကိုချွတ်လိုက်ပြီး၊ အနောက်ရှိဟယ်ရှင်းချွမ်လက်လေးကို ပုတ်လာတယ်။
"ဒီနေရာပဲ"

အိပ်ငိုက်မလိုဖြစ်နေတဲ့ဟယ်ရှင်းချွမ်က ပတ်ဝန်းကျင်ကို ရှုပ်ထွေးနေဟန်လေးဖြင့်လှည့်လည်ကြည့်ရှုနေတယ်။
"ထန်ကော၊ ငါ့ကိုတကယ်ကြီးရောင်းစားမလို့လား?"

"ပေါက်ကရတွေ"
ပြောရင်းနဲ့ပဲ၊ ယန်ထန်က အိတ်ကြီးကြီးတစ်ခုကိုဆွဲယူကာ လမ်းဘေးအတွင်းဘက်ခြမ်းဆီလျှောက်သွားတယ်။

ဟယ်ရှင်းချွမ်ကလည်း အနောက်မှအမြန်ကပ်လိုက်လာတယ်။

ပြောင်းဖူးတွေရိတ်သိမ်းရတဲ့ရာသီဟာ ကျော်လွန်ပြီးသွားခဲ့ပြီ၊ ပြောင်းဖူးခင်းထဲမှာ ကျန်ခဲ့တဲ့ပြောင်းဖူးရိုးတွေချည်းပဲ။

နွေဦးရာသီရောက်ချိန်ဆို၊ လယ်သမားတွေဟာ ပြောင်းဖူးရိုးတွေကိုမီးရှို့လေ့ရှိကျတယ်။
ရှေးအကျဆုံးဓာတ်မြေဩဇာတစ်ခုပေါ့။
နောက်တစ်နှစ်ရဲ့စိုက်ပျိုးချိန်မှာ ကောင်းမွန်စွာကြီးထွားစေနိုင်တယ်။

မလှမ်းမကမ်းမှာ၊ စက်ရုံအဟောင်းတစ်ခု။

ယန်ထန်က ခပ်တည်တည်ပဲ စက်ရုံတံခါးကိုဆွဲဖွင့်နေတယ်။
အနောက်ရှိဟယ်ရှင်းချွမ်ကတော့ မကျေမနပ်ရုပ်လေးဖြစ်ချင်နေပြီ။

ငါ့ကောင်လေးက မရိုတတ်လိုက်တာ!
ဒိတ်လုပ်ဖို့ကို စက်ရုံအဟောင်းဆီလာနေရလား!?

စက်ရုံက တော်တော်အိုဟောင်းနေခဲ့ပြီ။
လှေကားထစ်တွေဟာ လက်ရန်းတောင်မရှိတော့ဘူး။ အခန့်မသင့်ရင် အောက်ကိုတောင်ပြုတ်ကျသွားနိုင်တယ်။
အောက်မှာတော့ ဖန်ကွဲစတွေ၊ သစ်သားအပိုင်းအစတွေနဲ့။