အထူးလုပ်ကြံရေးသမတစ်ယောက်ရဲ့ စာမျက်နှာသစ်

အပိုင်း ( ၆၉) ဆရာမကိုတောင်းပန်လိုက်

အပိုင်း ( ၆၉) ဆရာမကိုတောင်းပန်လိုက်

"ပြီးတော့ သမီး အမှတ်မမှားရင် အဲဒီဆရာက သမီးရဲ့အဖြေလွှာကို လုံးဝ မမြင်ရသေးဘူးနော်၊ သမီး မေးပါရစေ ဆရာမလီက သမီးရဲ့အဖြေလွှာကို တိတ်တိတ်လေး တစ်ခုခုလုပ်ထားတာလား"

ရှန်ယွဲ့က ထပ်ဖြည့်ပြောလိုက်လေသည်။

" ငါ လုံးဝ ကူလီကူမာမလုပ်ထားဘူး၊ နင် မသမာနည်းသုံးခဲ့တာကို သိလိုက်လို့ နင့်အဖြေလွှာကို ဖယ်ထားခဲ့တာပဲ ရှိတာ"

မစ္စလီက မြန်မြန်ပြန်ချေပလိုက်၏။

ရှန်ယွဲ့က တစ်ဆင့်ချင်း ဖိမေးလေတော့သည်။

" သက်သေလည်း ဘာမှမရှိဘဲနဲ့၊ ဒါတောင် ဆရာမက သမီး မသမာတဲ့နည်းသုံးတယ်လို့ ပြောနေသေးတယ်နော်၊ ဒါက ဆရာတစ်ယောက်အနေနဲ့ လုပ်သင့်တဲ့အရာလား၊ ပြီးတော့ သမီးရဲ့အဖြေလွှာကို သိမ်းထားဖို့ ဆရာမမှာ ဘာအခွင့်အာဏာရှိလို့လဲ"

" ဘာလို့လဲဆိုတော့ ငါက ဌာနမှူးဖြစ်နေလို့လေ၊ ဒီတော့ ဘာဖြစ်လဲ" မစ္စလီ၏နောက်က ဌာနမှူးက ထအော်လိုက်တော့သည်။

တစ်ချိန်ထဲတွင် မစ္စလီကလည်း နောက်ကထောက်ခံပြောဆိုလိုက်၏။

" ရှန်ယွဲ့က စာမေးပွဲတိုင်းမှာအမြဲ တစ်မှတ် နှစ်မှတ်ပဲရပြီး ကျောင်းမှာ ဘိတ်ချေးဖြစ်နေတာ ဘယ်သူကမသိလို့လဲ၊ အခု သူက ရုတ်တရက်ကြီး အမှတ်ပြည့်တွေထရနေတာလေ၊ အဆင့်အကောင်းဆုံး လီရွှီတောင် အမှတ်ပြည့်မရဘူး၊ ဘယ်သူက နင့်ကိုယုံမှာလဲ၊ ရလာဒ်ကောင်းရဖို့ လိမ်ထားတာ သိသာနေတာပဲ၊ ငါက သက်သေလိုသေးလို့လား"

ဘေးကဆရာများသည် ထိုစကားကိုကြားလိုက်သောအခါ မစ္စလီကို ထောက်ခံလိုက်ကြတော့သည်။ သူတို့သည် သည်အဖြေလွှာကို အလွန်ကျေနပ်ကြသော်လည်း သည်အဖြေလွှာများကို ရှန်ယွဲ့ကဖြေထားသည်ဟု လုံးဝမယုံကြည်ကြချေ။

ထို့ကြောင့် အားလုံးက တစ်ယောက်ပြီးတစ်ယောက် ထပြောကြတော့သည်။

" ဟုတ်တယ် ရှန်ယွဲ့၊ မင်းကိုယ်မင်း သက်သေပြချင်တာ ဆရာမသိတယ်၊ ဒါပေမယ့် မင်း လိမ်လို့တော့မရဘူးလေ"