အပိုင်း (၁၀၀) ယွမ် တစ်သန်းလျှော်ကြေး
" ကျွန်မ ယောက်ျားက ဘယ်သူလဲဆိုတာ သိကြလား၊ သူက လုံထန် ကော်ပိုရေးရှင်းရဲ့ဥက္ကဋ္ဌပဲ၊ ရှင်တို့တွေ သူ့ကို စိတ်ဆိုးအောင်လုပ်လို့မရဘူးနော်၊ ကျွန်မ သားဆီမှာ တစ်ခုခုဖြစ်သွားရင် ရှင့်ကျောင်းနဲ့ ရှင်တို့ငတုံးတစ်သိုက်ရဲ့ အလုပ်တွေကို မေ့သာထားလိုက်ကြတော့" ထိုမိန်းမက ဆက်ပြီး ပွက်လောရိုက်အောင်ဆူပူနေလေသည်။
ချောင်ဖန်းက ရေးကြီးခွင်ကျယ်လုပ်နေသည်ကို အနည်းငယ်ရှက်ရွံမိသဖြင့် ကျန်းရန်က စိတ်မရှည်တော့ဘဲ ခေါင်းကိုစောင်းကာ ထောင့်တွင် ရပ်နေသည့် ရှန်ချန်ကို ကြည့်လိုက်သည်။ သူသည် အံကြိတ်ကာ ပြောလိုက်၏။
" အမေ ကျွန်တော် ဘာမှမဖြစ်ဘူး၊ ကျွန်တော့်ကိစ္စကိုပဲ အရင်ကူရှင်းပေး"
ကျန်းရန်က စိတ်တက်ကြွနေသည်ကို မြင်လိုက်ရသဖြင့် ချောင်ဖန်းသည် စိတ်အေးသွားတော့သည်။ သည်ကိုလာသည့်လမ်းတွင် သူမသည် သည်ကိစ္စကို အကြမ်းဖျင်း နားလည်ထားပြီး သူမ၏သားကို ဒုက္ခိတကျောင်းသားတစ်ယောက်က ရိုက်နက်လိုက်သည်ဟု သိထားသည်။ ထို့ကြောင့် သူမ၏အကြည့်က ထောင့်တွင်ရပ်နေသည့် ရှန်ချန်ဆီ ချက်ချင်းရောက်သွားတော့သည်။
ရှန်ချန်ကို ကြည့်နေရင်း ချောင်ဖန်း၏အမူအရာက ရုတ်ချည်း မဲမှောင်သွား၏။ သူမက ရှန်ချန်ရှေ့သို့ ခြေလှမ်းကျဲများဖြင့် လျှောက်သွားကာ လက်ကိုမြောက်လိုက်ပြီး သူ့ကို ပါးချလိုက်တော့သည်။
" နင့်ကိုယ်နင် ဘာများမှတ်နေလဲ၊ ငါ့အဖိုးတန်သားကိုများ ရိုက်ရဲရတယ်လို့"
ချန်းယန်က ချောင်ဖန်းကို မြန်မြန်တားကာ နားချလိုက်သည်။
" ကျန်းရန်အမေ ဒီကိစ္စကို ဆွေးနွေးကြရအောင်ပါ၊ တစ်ယောက်ယောက်ကို ရိုက်တယ်ဆိုတာကလည်း မလုပ်သင့်ပါဘူး"
" ထွက်သွားစမ်း၊ ရှင့်အလုပ်သာ ရှင်သွားလုပ်၊ ဒီနေ့ ဒီသောက်မျိုးမစစ်လေးကို အသေရိုက်ခဲ့ရင်တောင် ရှင့်အပူမပါဘူး"
ချောင်ဖန်းက ချန်းယန်ကို တွန်းလိုက်ပြီး တံတွေးထွေးလိုက်လေသည်။ ချန်းယန် ဘာမှမလုပ်နိုင်ခင်မှာပင် သူမက ရှန်ချန်ကို ဒုတိယအကြိမ် ပါးရိုက်လိုက်သည်။
YOU ARE READING
အထူးလုပ်ကြံရေးသမတစ်ယောက်ရဲ့ စာမျက်နှာသစ်
Romanceလုပ်ကြံသူအဖွဲ့တစ်ခုရဲ့ ပျိုးထောင်ခံလာရပြီး ၁၃နှစ်တာလေ့ကျင့်လာပြီးနောက်ပိုင်း ရှန်ယွဲ့ဟာ အသက် ၁၇နှစ်အရွယ်မှာတော့ အကောင်းဆုံးလုပ်ကြံရေးသမား ဂုဏ်ပုဒ်ကိုရခဲ့ပြီးတော့ လုပ်ကြံရေးသမားတွေကြားမှာ ပြိုင်ဘက်ကင်း legendတစ်ယောက်ဖြစ်လာခဲ့တယ်။ legendတစ်ယောက်ဖြစ်လာ...