قصتنا ع بنية زيها زي كل البنات سموحة و تقرا في وحدة من الكليات صح هوا معهد بس نظامه زي باقي الجامعات بس راهو مش توا من زمان زمانات يعني هكي بداية الالفينات بالتحديد سنة 2004 في البدايات هي كانت في مدينة الخمس و بطلنا في وحدة ثانية من المدينات اسمها الزاوية زينة الزينات ناسها احرار و في الحق ما يعرفوا اي مساومات 💖❤️
زي ما كتبت في المقدمة القصة حقيقية مع شوي اضافات للاثارة تحكي ع بنت من مدينتي الحبيبة الخمس ❤️و عيلة ثانية من مدينة الزاوية الله يحفظها
مش حابة ندوخكم بس خلي نعطيكم مفاتيح القصة من البداية واللي يركز باذن الله القدام ما يحيرش...
مرات تجاهد عمرك كله ع شان تفك قيود تشوف فيها انفرضت عليك و تبدا كاره الشخص او الاشخاص اللي حطوهم في ايديك و فجاة تتخلص منهم كيف؟! عاد هادي خلوها لاحداث الرواية المهم وقت تتخلص منهم تحساب روحك تفرح و تعيش مرتاح بس تكتشف بعد فوات الاوان ان القيود هاذي كانت حصن منيع حماية ليك من الناس و من الوقوع في المحظور تندم و يااااه ع الشعور هذا قداش صعب تتمنى لحظة وحدة ترجع وبايديك تكلبش نفسك في ذات القيود و برجليك تخش للسجن و انت راضي
بس مش معروف هل في فرصة ثانية او لا ؟!
خلي نتعرفوا ع شخصياتنا
و نبدوا من اهل الزاوية ع شان ما حد يقولي متحيزة لمدينتك ❤️
عيلة محافظة من ناحية التقاليد حالتهم مرتاحة ماديا من يوم يومهم من جد جدهم وهما تجار حرير و اقمشة عندهم محلات حتى في طرابلس و المدينة القديمة بالذات ...
نبدوا براس المال بو العيلة
مفتاح مواليد 1945 و زي ما اسلفت الذكر يكون تاجر حرير كان عسكري في زماناته و تقاعد خلاص حاليا ماسك محلهم الرئيسي في الزاوية و يراجع وراء صغاره في الحسابات راجل رزين عاقل العوج ما يحبه لمة عيلته في كل وقت هي اهم شيء عنده يا ويلهم لو يسمع باي اثنين منهم متقاطعين او متخاصمين لاي سبب
الحاجة منوبة و هذه والدة مفتاح عزوز طيبة و حنونة عايشة مع ولدها مفتاح لان صغارها الثانيين اقترحوا تقعد عند كل واحد اسبوع و هالشيء حز في نفسها لكن مفتاح اعترض وقال امي تقعد عندي في حوشي و بهكي قعدت عنده و متفاهمة مع زوجته و صغاره و باقي اولادها و بناتها يجوها زيارة عنده
زوجته عويشة مواليد 1955ربة بيت خذت طبع الجدية و الحزم في امور العيلة من زوجها بس طيبة يعني برغم جديتها لكن حقانية و الغلط ما تحبه عيبها الوحيد وقت تغلط ما تتنازل لو شني يصير و مستحيل تعتذر ...متعلقة بصغارها لابعد حد تحبهم هلبة لكن لو غلطوا سيف عليهم ما تعرف تجامل بكل
نجوا لصغارهم
بكرتهم بنية اسمها مديحة مواليد 1973 متزوجة من ولد صاحب بوها اسمه سعد مواليد 1969 الاثنين معلمين في نفس المدرسة بس هي ابتدائي و هو اعدادي
عندهم ثلاث صغار
سارة مواليد 1999
سندس مواليد 2000
سند مواليد 2002
