ندى : بالله عليك هيا معانا برا عزيزة
عزيزة دفتها و كانت تضحك و تمشي في اتجاه قسم اللغة الانجليزية و هي في حالة صدمة لعند وصلت فيهم
منذر استغرب علاش جاية جهتهم بس حنين باعتبار انهم يركبوا في باص واحد توقعت انها جاية تباركلها
عزيزة : ههههههههههه.. الف الف مبروووك تعرفوا ع قد ما شفت اثنين مخطوبين عمري ما شفت اثنين يطلعوا ع بعض زيكم راكبين ع بعض هلبة
منذر ما حب طريقتها في الكلام بس سكت و اكيد كان ملاحظ انها تراقب فيه من قبل
و حنين حست انها تلمح لشيء بس تجاهلت الموضوع : الله يبارك فيك و عقبالك
عزيزة وجهها تغيرت ملامحه للحدة : ان شاء الله قريب و اهم حاجة مش ح يكون منافق
ندى جبدتها بقوة : الف مبروووك هيا عزيزة معاي
مشت و هي مازال عيونها عليهم ناااار
و هبة و سمر مشو وراهم
منذر : من وين تعرفيها هادي ؟
حنين باحراج : تركب معاي في الباص
منذر : يا ريت تفوتيها واضح بنت مش مزبوطة ضحك بصوت عالي و تشوف فيا واقف معاك جاية بصحة وجه تبارك
حنين : اصلا انا علاقتي بيها سطحية و استغربت انها جتني
منذر : احسن حاجة انك سيبتي الباص لان هذا شرطي ع خوك و هو وافق
حنين : اي كلم السواق معش يجيني و وعدني يوصلني هو في الجديد
منذر شاف حواليه : خلاص توا امشي لمحاضرتك وقفتنا بايخة مع بعض و انا ما نبي نجيبلك الكلام
حنين ابتسمت : تمام عن اذنك
منذر ابتسملها
و هي مشت و هو خش للمكتب
بينما عزيزة مشت وراء المعهد للمكان اللي يقعمزوا فيه في العادة شدت شيتاتها و مذكراتها و بدت تعصر فيهم و تئن من الوجع : امممممم يا ربي شفتوه كيف واقف معاها بكل بساطة هكي خطب و بيتزوج و انا ؟ انا من لما عرفت ان تفكيره فري و متحرر تحشمت في الجلباب اللي نلبس فيه درت كل شي من وراء بابا ع امل اني نلفت انتباهه و في الاخير ياخذ وحدة زي هادي لبسها و تصرفاتها مش ليه يا ناس
سمر : و علاش الحسد بس اكيد شاف فيها حاجة عجباته ممكن انت لبسها مش عاجبك بس هو عاجبه خلاص الراجل مش نصيبك
كلهم شافولها بنظرة لوم لان مش وقته الكلام هذا و لو كان صح
عزيزة مسحت دموعها و حولت الشيتات من عليها : شني قصدك سمر ؟ يعني انت بدال ما توقفي معاي متشمتة
سمر قلبت عيونها : و علاش بنتشمت انا بس ما نبيك تحطي ذنوب البنت في رقبتك لان مش ذنبها ان منذر عجباته و خطبها