مرت الشهور تباعا بدون احداث تذكر .....ع شخصيات الرواية الكل حياته ماشية في هدوء و استقرار و اي تغييرات ح يتم ذكرها لاحقا...
و مع بداية الدراسة لدى الجميع و اللي كانت في زي العادة وقتها في منتصف سبتمبر..... كان موعد سفر مودة و صلاح
يوم السفر كان صعب هلبة ع الجميع .....
شناطيهم جنبهم واقفين في حوش اهل صلاح
خوات صلاح كلهم يبكوا لان امهم مسافرة من جهة مرتاحين عليها مع مودة و صلاح و فرحانين انهم ما سافروا و سيبوها و من جهة كان تسكير حوش العيلة صعب هلبة عليهم
مودة في حضن امها و تبكي 😭 و مديحة جنبهم تمسح ع راس اختها
الكناين كلهم واقفات واجعهم الموقف
عزيزة تذكرت كلام بوها"فراق الحيين ساهل " ابتسمت و نزلت دمعه مسحتها ودعتله بالرحمة ...
منوبة مقعمزة جنب سعيدة
صلاح ينادي من برا : هيا مودة تعالي خوك بيسلم عليك
حضنت امها هلبة و باست ع راسها وايديها : ربي يحفظك بحفظه و نسمع عنك كل خير و منقولك "بهمس " انا حامل
عويشة ضحكت: ههههه و داستها يا ريتك قلتيها من بكري الحمدلله ربي يتمم عليكم بخير
يسرى لا اراديا ضغطت ع ايدها اصعب شي وقت اثنين يتزوجوا مع بعض يبدوا في المقارنات وقت وحدة تحمل والثانية تتاخر وهي من الاول متضايقة بسبب تاخر الحمل خاصة بعد حمل ندى و حاليا مودة مع ان كل اللي مر ع زواجهم تقريبا ثلاث شهور لكن الطاقة السلبية اللي توصلك من الناس تحسسك ان المدة اضعاف مضاعفة
عزيزة شدت في ايدها : قريبا نسمعوها منك باذن الله
يسرى ابتسمت مجاملة : ان شاء الله
عزيزة : قولي قالتها عزيزة زي هاللحظة ح نشوفك تجري وراء صغارك اللي بيكونوا باذن الله زيك و زي بوهم حركيين و قالبين الحوش فوقي لوطي وليك مني دعوة من قلب صادق باذن الله يوم ولادتي
يسرى قرصتلها خدها : يا وخيتي سلمك تعرفي انك احسن وحدة بعدي طبعا
عزيزة ضحكت وحولت ايدها : هههههه عارفة روحي
امل تسلم ع مودة و توصي ع امها : امي يا مودة بالله عليك
مودة. : في عيوني ان شاء الله و حتى انتم امي بالله عليكم في عيونكم
كلهم اشرولها بالتمام : ان شاء الله
و من ثم سلمت ع عزيزة ويسرى مع بعض : في حفظ الله تعرفوا والا تهبلوا خليكم ديما هكي
يسرى : ان شاء الله
عزيزة : يارب وانت ديري بالك من روحك و روحيلنا دكتورة قد الدنيا
