مشي باقصى سرعة لحوش عمه ما يشبح في اي شيء قدامه الا يسرى و هي واقفة تتهم فيه بكلام اول مرة ينقاله من شخص
درس سيارته قدام حوش عمه نزل من السيارة بعصبية و طق ع الباب
ايمن سمع الصوت لان كان جالس في بلكونته وقف و اول ما نزل راسه شبح ماجد نزل بسرعة ع شان يفتح
وقتها خواته و امه سمعوا الصوت و طلعوا لذات السبب ام السعد ساعدوها بناتها
اما جبريل ما يندري عليها من وين زارقة نوووووم
فتح ايمن الباب : يا ساتر شني في جاي توا ؟!
ماجد خش ووقف في مكانه بدون ما يقول اي حرف
ايمن : ماجد يا ماجد نكلم فيك
ام السعد سمعت اسم ماجد خلاص : ساعدوني نطلع
ساعدوها بناتها و صفاء كانت ميتة خوف
ام السعد : شني في؟
ماجد اعطها نظرة سم هي و صفاء: كلامي لبنتك حاجة حاكيهالك علاش تعاودي فيها و ياريت حتى قلتيها زي ماهي ! لا كاذبين ع لساني انا امتى غلطت في عمتي و بناتها امتى ترا
ايمن فهم اللي فيها : ماجد مش مكانه و لا وقته الكلام هذا تعالى غدوا بكري و نحكوا فيه
ام السعد بصوت عالي : لا وقته وقته خليه يسمع مش انا اللي بناتي يضحكوا عليهم يا فالح مش انا اللي جداك تكذب و تقول جدك عاطي قلة السماح اي ما تشبحلي هكي هذا كلام عمتك و هذا علاش رديت عليها و مش نادمة و بنتها اللي حرقتني هادي و الله الا ما نحرقها حرق نخليها تتمروج قدامي و انا نتفرج
ماجد مصدوم في ديداه: كيف جداي بتكذب في حاجة زي هادي
ام السعد : اي تكذب لان امك مش راضية تاخذ مروة لطاهر و انقولهالك توا و معش في كلمة بعد كلمتي لو ما طاهر يخطب مروة و يقرا فاتحتها اول ما يروحوا من العمرة تجي و تاخذ دبشك و انا بناتي عليهم بالطابور و الله العظيم صفاء الا ما نعطيها قبل العام تسمع فيا والا و الخطابة لبناتي خوت اثنين يراجو غير في ردي
ماجد انصدم شبح لصفاء و: موافقة ع كلام امك يا صفاء
صفاء تبكي و تستنجد بمروة اللي كانت فرحانة لان اللي تبيه صار
ام السعد : صفاء ما عندها كلمة معاي ما تكلمهاش بكل خليك معاي انا
صفاء بتوسل : امي لا بالله عليك
ام السعد فنصت فيها : فمك ضميه هذا كلامي و لو ما صار اللي قلته يا ماجد حاجتك تاخذها كاملة و كل واحد يشبح نصيبه
ماجد شبح لصفاء بنظرة خيبة كبيرة و رجع نظراته لايمن اللي للاسف ما يقدر يدير شي
طلع من جنبهم و هو بين عيونه ان يسرى و طاهر ممكن يكونوا السبب في خراب حياته
