نكملوا احداث الرواية من عند محمود و جارتهم صبرية
صبرية بعد تردد : اللي جاية ع شانه يخصك انت و مراتك اللي فارقتها امل سمعت من مراة خوي ان ولدها بالقاسم اللي مراته ماتت من سنة و انت تعرفه ما هو يقرئ في نفس المدرسة اللي تخدم فيها امل
محمود راسه داخ من تطويل الدوة: خالتي صبرية قولي شني في من الاخر لاني ما فهمت منك شي
صبرية : سامحني يا ولدي غير عارف صيام و الحق انا وجعتني انت وامل و وجعوني الصغار جيت بالك ربي يهديك و ترجع مراتك
محمود بنفاذ صبر : عارف نيتك يا خالتي غير قولي خيره ال(سكت و استاقض لروحه) استغفر الله خيره بالقاسم ؟!
صبرية تنهدت : يا محمود ديداك ام السعد قايلتها في كل مكان انك فارقت مراتك وطلقتها و خطبت وحدة ثانية و انا والله الكلام هذا حتى من امك ما سمعته لكن هي قايلاته للجيران كلهم و مخبرة حتى مراة خوي اللي ليها وقت تزن ع ولدها ياخذ مراة بعد ماتت مراته و هو يرفض بس وقت خبراته ان امل اطلقت و انها تبيها تكون هي مراته و تساعده في تربية الصغار بالقاسم وافق و انا سمعت انهم بيخطبوها وجعوني صغاركم رد مراتك سلم ولدي و ابعد الشيطان من بينكم انا صح ولد خوي نتمناله كل خير لكن حتى انت تعز عليا و صغارك انا اللي محممتهم في اسبوعهم و ياما شديت فيهم و ربجت و ما نبيهم يعيشوا قزازين واهلهم عايشين
محمود اصيب بحالة جنون قولوا هلع عمره ما عاش شيء زي هذا من قبل : 😡😡😡😡 انت شني تقولي يا خالتي شني تقولي تي كيف تنخطب وهي ع ذمتي
صبرية تفاجئت : كيف ؟! يعني انت ما طلقتها
محمود مشى ايده ع شعره بقوة: لا لا ما طلقتها و مش ح نطلقها و ولد خوك لو تحبيه زي ما قلتي خليه يمشي بعيد عليا و عليها والا و رب الكون ندفنهلكم حي
صبرية رعشت ما توقعت ان الموضوع هكي: بس ديداك ام السعد قالت
محمود بصوت عالي : تي هذه نهارها احرف ع راسها مالها و مالي نطلق والا ناخذ شني تكذب عليا
صبرية خافت منه وقفت : سامحني يا ولدي والله نحسابكم الا متفارقين وجيت نقولك بالك تردها و تربح يا محمود لو تعزني بالقاسم لا تقربه و لا تدوي معاه انا خليني بيني و بينه
محمود فوق من النفس : خليه يبعد عنا لو ما تبيني نضره
صبرية ماشية جهة الباب : باهي باهي و الله ما نخليه يكمل فيه الموضوع غير هذي روحك
محمود سكت وهي مشت الباب بتروح
تعود من الشيطان و مشي وراها سقدها لانها مش بعيدة عليهم : خالتي صبرية سامحيني لكن قريب هبلت راهو مازال مراتي و تقوليلي في واحد بيخطبها
صبرية : معذور يا ولدي معذور الله لا تربحها ام السعد هذه الله لا تربحها اصلا هي اللي قالت عليها لمراة خوي
