( و الله جزء صعب نكتبه توا بس حبيت نقرب الصورة و انزلكم تشويق ثاني )بعد صراع طويل في محاولة للامساك بالطيف اللي تشبح فيه قدامها فاقت من النوم و الروح بلغت الحنجرة من ضيقة علمها الدموع رافضين النزول تسمع في صوتها في كل مكان و مش عارفة هل مازال حلم والا علم تحركت من مكانها و دورت جنبها لعند القت قطعة من ملابسها خذتها و حضنتها بقوة
و ضاقت عليها الارض بما رحبت معش قدرت تقعد في المكان طلعت متخطية الكل جنبها
طلعت من الحوش و قعمزت تحت الشجرة اللي ياما كانت مكان ليها تتحسس في التراب اللي تحتها
و بصوت مليان حزن و شجن صوت مخنوق بالحقيقة الوحيدة في الحياة و اللي هي عكس الحياة نفسها الموت ..
بدت تدندن بصوتها ذاته اللي ياما نادى عليها بس اليوم مش موجودة و اللي كاسر قلبها ان موتها كان بسبب اقرب الناس ليها هي هكي شايفة و ما حد يقدر يلومها ع اللي تحسه و ع النار اللي حارقة قلبها
بدت تدندن و تغني
جابك منام الليل وانا غافى ...جدد جروح الموح زاد اريافى
*جاب حنينى ... وجاب شوق فى قلبى وسهر عينى
انت حبيب العمــر وتجــافينى
ونا طول الحياة والعمر عهدى وافى
*جابك ليا... جاب شوق من الماضى العزيز عليا
اشتاق خاطـرى لقربك ومو بيـديا
ليـام كنت معـاى قلبــك صـافى
صوتها نوض الكل و اثر فيه بطريقة مختلفة لان الكاس ذاته ارتشفوا من مرارة مذاقه رشفة و النار ذاتها لسعتهم
و كل واحد خطر في باله عزيز مفارقه وين يخطر ع القلب ياما يصير فيه
وانا غافي جابك مناااااام الليل ...
مع تحياتي
مارية علي الخمسي ❤️❤️❤️❤️