خشت ندى بعد ما سمعت كلام ماجد و لان الحب اعمي و القلب اعمى اكيد صدقاته و نسجت تفاصيل من خيالها و ممكن لانها ايقنت خسارتها ليه و حاسة بالعجز صارت تدور في مبرر ع شان تحطه للخسارة هذه
خشت مندفعة و دفت اختها بقوة اللي انصدمت و يا دوب قدرت تتوازن : خيرك ؟
و قبل ما تكمل كلامها
ندى للاسف ضربتها كف بكل قوتها
و هالمرة كان الكف قوي و صادم بحيث ما قدرت تتوازن لعند جت ع الكرسي و طاحت هي وياه
قدمت منها ندى و وقفت جنبها و تشبحلها من فوق : مش بس رخيصة زي ما قال انت وحدة حقيرة و تافهة و رخيصة وحدة ما تسوى شيء اللي تدير في اختها هكي عارفة قداش نحبه و ميتة فيه عارفة قداش محروقة بسبب خطبته بدال ما تساعديني انا نفوز بيه تمشي تلعبي من وراي ع شان يسيب صفاء و ياخذك
ابدا ما صدقت الكلام اللي تسمع فيه لوهلة اجزمت انها اضغاث احلام و ما هي الا لحظات و تفيق من الحلم لكن للاسف اللي فاقت عليه حقيقة مؤلمة وقت
خشت مديحة اللي سمعت الصوت حطت ولدها في الدار و جت ع طول
و وقت شبحت يسرى في المنظر هذا انخلعت : يسرى خيرك ؟! ندى قيميها
ندى شبحتلها ع جنب : انا ما طيحت حد باش نقيمه
و طلعت من المطبخ و هي في قمة انانيتها مش قادرة نقول عليها غير هكي
مديحة مدت ايدها ع شان تساعد يسرى
لكن يسرى رفضت و وقفت بروحها : قالتلك طحت بروحي نوقف بروحي
مديحة حست ان في شي كبير صاير : يسرى احكي شني في ؟! خليتك مع ماجد نجي نلقاك مع ندى و طايحة ع الارض و ندى تقول في كلام مش مفهوم
يسرى تواسي في حوايجها و بعدين رجعت الكرسي زي ما كان : علاش مش مفهوم كلامها واضح من طول عمري وقت انطيج نوقف بروحي
مديحة حست انها ابدا مش بخير : يسرى قولي خيرك يا بنت واضح صاير شي اعتبريني اختك
يسرى بعفوية: بس انا ما عنديش خوات
مديحة تاكدت ان في سوء تفاهم بينها و بين ندى لكن ما عرفت اذا هالسوء التفاهم ليه علاقة بخوها : باهي غير تعالي قعمزي
يسرى : مستحيل نقعد دقيقة وحدة في حوشكم بس قبل ما نمشي نبيك توصلي كلام لخوك اللي مصر ان يخسر العيلة بعضها قوليله لو تعرضلي مرة ثانية اقسم بالله نخبر خوتي و معش نهتم اذا العلاقة انقطعت او لا و قوليله انت لو يربطوك في رجلي انقصها و خليه يهز راسه وراء الحقيرة خطيبته تو تنفعه باهي
و جت طالعة من المطبخ
بس مديحة شدتها : غير استني وين ماشية