اعطني حريتي

Part 26

(حسبنا الله و نعم الوكيل ... قعدنا في شوق دائم للضي 😭)

جبريل بصوت عالي و مسموع : يا جماعة الخير نبي نشور عليكم في موضوع و نبيكم تشهدو بالحق ..

طبعا وقتها كانوا في من اقاربهم و ابناء عمومتهم حاضرين ..

مفتاح و اولاده و سعد و مسعود و ايمن في حد ذاته تقاجؤوا بتصرف جبريل و لدرايتهم بطبع جبريل الخوف سيطر عليهم

: تفضل يا جبريل و ان شاء الله ما نشهدوا الا بالحق

: اي شنوا اماله عهدك بينا مش تريس

: قول و باذن الله ما نقولوا كانوا الحق

جبريل عيونه ع خوه : انا عاطي بنتي لولد خوي لكن من سنين حالف بالطلاق ان بناتي ما نعطيهم كان لخوت و وقت عطيتها لولد خوي كان كل ظني ان اختها بياخذها خوه

ماجد معش يشبح في شي قدامه ظلمت عنده من الطريقة اللي عمه فتح بيها الموضوع و طاهر مش احسن منه حال اما مفتاح فاكيد تحشم من ضيوفه وان خوه حطه في موقف زي هذا و محمود كان يلقى يجبد عمه و يطلعه برا من الحوش لكن اكثرهم حشمة كان ايمن لا قادر يوقف في وجهه و لا قادر يرفع راسه في الحضور بعد كلام بوه

مفتاح: يا جبريل مش وقته هالكلام

جبريل : لا وقته يا خوي و خليهم يشهدوا بالحق توا انا بين زوز طرق !! يا خوي مفتاح ياخذ بنتي الثانية لولده يا اما يسامحوني لان نسيبي وقت حكيتله قالي ان يبي بناتي الاثنين لاولاده يعني يا مفتاح يا قدم يا وخر

مفتاح مش مصدق تصرف خوه قدام الحضور

مسعود بحكمته حاول يلم الموضوع : مش وقته يا جبريل و خليها مرة ثانية بيناتكم و حلوه الموضوع

جبريل : انا الكلام بيني و بين خوي و اللي حضرتهم اولاد عمي مش برانية يعني انت اللي ما دخلكش يا مسعود و اطلع منها

مسعود حس موقفه بايخ هلبة هو تغاضى ع كل شي و حب يدير خير بس جبريل قلبه اسود و ما ينساش : معاه حق انا نستاذن يا جماعة

مفتاح باعتراض : والله ماك طالعها يا راجل انت منا وفينا

باقي ابناء عمومة جبريل كانوا بذات الراي و حطوا الحق ع جبريل

جبريل بامتعاض : توا خلونا من الموضوع هذا وانا نراجي في ردك يا مفتاح

مفتاح اللي انحرج هلبة شبح لخوه و من بعده لاولاده الاثنين ماجد اللي نزل راسه و طاهر اللي كان يبان للكل ان هادي و بارد بس لبوه اكيد لا لان فهم نظرته لكن ما يقدرش يقول اي كلمة بخصوص حسم الموضوع قدام الكل ضاع بينهم بين سعادة ماجد و بين كسر قلب طاهر

حار دليله..

طاهر ما حبش يشبح بوه في موقف زي هذا قرر يعفس ع قلبه و كرامته و ينهي الجدال في الموضوع هذا