وعند محمود و طاهر وصلوا و انصدموا بماجد اللي كان يعوم في الجو الشتوي هذا و في الليل فوقها
طاهر بصوت عالي : يا راجل خيرك هبلت ؟!
ماجد كان كيف طالع من البحر يمشي و ما يبي يرد عليهم بكل
محمود حول التوب اللي لابسه.: البس و فكنا شني تبي تموت انت ؟!
ماجد ببرود : ميت انا اصلا مني اللي قالك اني عايش
طاهر: لا حول و لا قوة الا بالله .... علاش ما تفكرش في الجانب الكويس الحمدلله البنت ما صارلها شي تخيل يعني لولا لطف ربي ان ...
ماجد : اسسسس خيرنا يا طاهر راني مش متحمل كلمة !
طاهر فهم شني كان ح يقول و كيف ممكن يأثر ع اعصابه الكلام هذا : خلاص سامحني لكن اللي انت فيه مش حل !! مش حل انك تقتل روحك
ماجد بقلة حيلة : باهي شني الحل ؟! ممكن تقولي انت بالك تعرف خير مني دلني شني ندير؟
طاهر بهدوء : البس اول شي
ماجد باستسلام خذي التوب من محمود و لبسه
و طاهر اعطي الكبوط اللي لابسه لمحمود : البس صقع انا عندي توب تحته
خذاه محمود لان كان لابس تيشرت كم تحت التوب و لبسه
و مشو قعمزوا في مكانهم ...
طاهر : انت المفروض توا تفكر كيف تصلح اللي درته
ماجد بياس و قلة حيلة : ما يتصلحش يا طاهر مشيتلها و ترجيتها ما خلتنيش حتى نتكلم و كانت حالتها صعبة و انا بيني و بينك عاذرها لان اللي درته مش شوية كيف بس قدروا يضحكوا عليا و بكل غباء مشيت وراء كلامهم زي الحمار
محمود يبيه يهدى : حاشاك .. كلنا في لحظة معينة نتصرفوا بغباء يعني احني توا ننصحوا فيك لكن لو كنا مكانك مرات درنا اسوء منك و غلطنا اكثر
طاهر تدكر اللي صار معاه و معاها اليوم : معاه حق محمود .. كلنا وقت نكونوا برا من الموقف نطلعوا اذكياء و عندنا حكمة لكن وقت نكونوا في المشكلة نطلعو...
كمل ماجد : حمير
طاهر : 😒
محمود و ماجد : 😂😂😂😂
و طاهر معش قدر يقاوم اكثر : هههههههه ربي يهديكم و خلاص
بعد ربع ساعة
