في الطريق لحوش اهل امل
مفتاح كان يجهز في الكلام اللي يبي يقوله لطاهر ع طلب صلاح ليه
طاهر حس ع بوه : اي يا بوي شني الموضوع اللي بيحكيه محمود وانت وقفته
مفتاح حاول يتصرف و كأن الموضوع عادي جدا : في حد طلب اختك مني
طاهر عقد حواجبه : بالسرعة هذه ! مني ؟!
مفتاح : واحد نعرفوه و شخص موثوق و تبي الحق من قبل كان طالبها مني بوه لكن وقتها انا عاطي كلمة لخالك نوري معش قدرت نتراجع فيها
طاهر : باهي اعطيني اسمه علاش تتكلم عليه بالغموض هذا
مفتاح تشجع : صلاح
طاهر ابدا ما خطر في باله صلاح هذا : صلاح مني ؟!
مفتاح : نسيب خوك ...
طاهر وجهه تغير ع طول و زاد السرعة
مفتاح بشرح: راهو وعدني و عطاني كلمة راجل ان مستحيل يضرها و ان موضوعها ما ليه اي علاقة بموضوع اخته حتى اني قبل ما نرد عليه اصريت ان نردوا امل لمحمود اليوم و هو وافق
طاهر مش حاب العجلة : لكن يا بوي انا مش حاب تستعجلوا فكر فيها هي يا بوي ح تدمر نفسيتها اكثر و تفكر ان احني ما صدقنا جي حد و خطبها و خاصة ان صلاح اكبر منها و مطلق
مفتاح : عارف لكن اقل شي عارفين سبب طلاقه هذه حاجة و بعدين انا لو حقا كنت قالق منها كنت عطيتها ل### (يحكي ع ولد عمه اللي جي و طلبها )
طاهر شد فرينو لعند بوه خاف : بسم الله
طاهر : مني اللي طلبها و هذا كيف يتجرا و هو بمرته و صغاره و فوقها قريب يجي في عمرك يا بوي فهمني شني اللي قاعد يصير و بعدين موضوع صلاح سكره لانك بيه بتفتح باب جديد للمشاكل مع عمي جبريل و احني مش ناقصين
مفتاح رد ع تيليفونه : اسبقونا يا محمود شويا و جايين وراكم
و محمود اكيد فهم ان بوه يحكي لطاهر في الموضوع : ماشي ح ندرس قدام حوشهم لعند توصلوا
مفتاح : دير رايك
طوط
طوط
مفتاح : اسمعني يا طاهر انا عمك مش ح نديرله اي اعتبار لان مرته مطلعة كلام ع اختك و هذا السبب اللي خلى ولد عمي يجيني و يطلبها لولده وهو عارف اني لو ظروفي عادية مستحيل نعطيهاله و مش ح يوقف الموضوع اهني الدوة ح تزيد و اختك مش ح تتحمل و هي اللي شادة تبي تعوض اللي فاتها و تقرا ترا فهمني كيف بتواجه الناس بعد الكلام هذا و هي ع قولتك نفسيتها تعبانة و صلاح عطاني عهد يوقف معاها و يخليها تكمل قرايتها زي ما طول عمرها تحلم و عاهدني ان حياتهم في جهة و حياة اخته في جهة و انا قبل ما انت تجي فتحت مع اختك الموضوع حسيتها عادية مش متفاجئة قالتلي نصلي و نفكر و نرد عليك خلينا نشبحوا ردها و انتم خوتها اسالوا عليه صلاح اكثر حطوا عليه الشروط اللي تريحكم بالنسبة ليا بعد كل اللي صار مش شايف غيره مناسب و مستحيل يضرها
