باعتبار ما في حلقة اليوم حبيت نحمسكم شوياشني يعني عرس ليبي زمان؟
يعني لمة الجيران و الاقارب و الاحباب من اول زغروطة و في اللي يجي بنية صافية بدون حتى عزومة
يعني اللمة و العينة و الايد في الايد من يوم الكسكسي اللي يتزين باغاني لو الطويل او ما يعرف بالعلم
و عاد يوم الحلاوات بروحه اللي يلتموا في الشبابات و بانت العيلة و الجيران يديروا فيهم بقلب و صفرة تطلع و صفرة تخش
يعني الصغار هم زينة العرس لا في من يقلق منهم و لا في من يقول جنة الاطفال بيوتهم مش عارفة هل الصغار تغيروا او احني تغيرنا و معش متحملين بعض
يعني من يوم الكسكسي و السويقة (الزميتة) لعند يوم تغربيل دقيق الشعير اللي في العادة يديروه عرب العرس ع شان يعرفوا الحاضرات ان عاد عابيين عليهم في العوالة متاع العرس المهم من الايام هادي و الحوش مفتوح بابه لاحبابه لعند يوم الزفة سوى عرس بنت او ولد
ربي يدوم افراحنا و استنوني في حلقة جديدة غدوا ان شاء الله
دمتم في حفظ الله و رعايته
مع تحياتي مارية علي الخمسي ❤️❤️❤️❤️❤️❤️