بينما برا مشت سالمة لسعد القاته مقعمز و يخمم : السلام عليكم و رحمة الله و بركاته
سعد : و عليكم السلام
سالمة بجدية : ممكن تتكرم و تفهمني شني اللي قاعد يصير ؟!
سعد مرتبك : ما في شي
سالمة : انا ماني عيلة يا سعد نفهم راهو و كل شي واضح قدامي ان في تخطيط لحاجة فيا تقولي بروحي يا اما لا خوي و لا نعرفك
سعد تشجع : انا نبي نرد هاجر يا سالمة ع شان البنات
سالمة : 😨💦💦💦💦
سعد : 😔😞😔😞
سالمة : من طول عمري وانا نشبح فيك سلبي لعند تزوجت مديحة تغيرت و عقلت و رزنت فرحنا بيك و فرحنا بيها اللي ولت من عيلتنا تحس بينا من قبل ما نقولوا الاه نلقوها بينا هذه هكي يكون جزاتها ؟! المراة اللي قعدت سنين في حوش العيلة تساير فينا كلنا اللي تحملت عيلة كاملة حتى سالم الله يرحمه عاملاته كيف خوها و لا عمره شبحنا منها العيب كانت عروس و تطلع من دارها بحجابها و لا عمرها كحلت حتى الكحل قدام خوك الله يرحمه و يوم اللي بنيت الحوش معاك ايد بايد لآنك مش قادر تجيب عمال دارت ع شانك اللي ما تديره اختك بس يا خسارة ديما اللي يشريك بالغالي تبيعه بالرخيص
رخيص هلبة يا خوي من كثر رخصك اهو قدامك خوك ليه شهور ميت و هي مادة رجليها للحنة ع شأن تاخذ خوه ... انا من اليوم ما عندي علاقة بيك و امي ح ناخذها عندي مستحيل نخليها تشهد ع الفضيحة اللي بتديرها لان وقتها ح تموت و ح يجي اليوم يا خوي اللي تبكي فيه بدال الدموع دم ع مراتك و صغارك بس وقتها مش ح ينفع الندم لان بيكون فات الوقت
طلعت و قربعت الباب
و سعد حط ايديه ع راسه و دموعه عبوا عيونه حس روحه فعلا ضايع
سالمة من كثر ما تعصبت اتصلت براجلها جي خذاها و رفعت معاها امها اللي كانوا عيونها يبكوا و يقولوا في هلبة كلام بس للي يفهم
و المفارقة ان من فهمها هو هاجر لانها عارفة باللي داراته
هاجر من كلام سالمة و دعاها عليها وقت طلعت امها خافت و عرفت انها كلمت سعد و اكيد سعد خبرها بان ناوي يتزوجها و اهني كان لازم تتصرف
بخت برفانها وحطت روج وردي ...كانت لابسة توتة حطت وشاح و شعرها نازل منه و الحنة بلون الدم في ايديها و رجليها
بدت تمشي ع روس اصابعها للمربوعة
سعد كان راقد و ايده ع وجهه
