(اسفة جدا هذا وين جانا الضي 🥹)
ام السعد بكل صحة وجه : ايه يا لطيفة ما قلتيلي ان شاء الله صار منه موضوع بنتك
لطيفة ما فهمت عليها شني تقصد : كيف ما فهمتكش يا ام السعد اي موضوع و ع مني من بناتي تتكلمي
ام السعد بخبث عيونها ع ندى و بناتها الاثنين ضحكوا : تي بنتك ندى ما هو يومها ماجد وليدي عندي يهدرز معاي و من سيرة لسيرة قالي عنده صاحبه ظروفه تعبانة و يبي يناسب عيلة ع قدهم كلمني عاد ع مروة قلتله عيب عليك بنتي مروة الزين و الحسب و النسب نعطيها لاي حد كان هذا راهي وافقت ع ولد عمتها يمشي خطرت عليا بنتك قلت يا ناري بتقعد و مش ح يجيها حد يناسبها
ندى الدموع عبو عيونها حطت الكاشيك من ايدها و خشت تجري للدار
لحظة صمت
بس هي حتى ولو في نظر الكل تصرفها ينحسب قلة ادب و وقاحة لكن ما تعودت تسكت ع اهانة من النوع هذا و في حوشهم والاهانة حاليا مش لندى بس لا للعيلة كلها شبحت لصونية الشربة اللي في الوسط خذتها و بزعتها ع ام السعد
و من صمت قاتل لعياط صارخ لم عليهم اللي في المربوعة
: واااااااااااااااااااك ووووووووك احححححححححح
لطيفة: 😱
و كذلك البقية ماعدا بناتها
صفاء تساعد في امها : هيا يا ماما للحمام بسرعة هياااا
مروة: و الله نوريك عليها يا كلبة يا بهيمة
يسرى مازال واقفة والنار بتطلع من عيونها : ملحي انت وياها
لطيفة : يا حليلي منك يا بنت انت يا حليلي .. خوذيها للحمام يا صفاء توا نجيبلها حوايج
ام السعد تنقز : وووه عليا يا بنت اليهود انت توا نوريك ووووه
اسراء وقفت معاهم تهدي فيها و خذوها للحمام
مديحة مصدومة و خلاص
نادية و نور : 😂😂😂😂😂😂
يسرى مشت ايدها ع شعرها : ان شاء الله تتمحمط مش مرة ثانية تعرف كيف تجيب سيرتنا
مديحة : حيه عليك لكن المفروض ما درتي هكي حرقتيها
يسرى شبحت لمديحة و الدمعة بتفر من عيونها : انحرقت امشي اشبحي اختي كيف محروقة ما تجي شي حريقتها قدام حرقة ❤️🔥 الشربة مع الوقت تصح لكن حريقة اختي يقعد اثرها العمر كله يا مديحة
خيرية (مرة عمهم) : يا بنتي والله عارفة كلامها بايخ و عيب لكن المفروض ما درتي هكي عيب حتى انت و توا توصل في التريس يحطوا الحق عليك
: يسرى !! ندى
خيرية اشرت ع الباب : اشبحي اهو بدو ينادو يستر الله
