بعد اقلاع الطايرة للمملكةو روحوا الكل
بعد ساعات ....من مغادرة الجميع
كانوا في الصالة مع بعض يهدرزوا و اكثر كلامهم تعليق ع عزيزة كيف كانت قالبة وجهها لما تحساب روحها مش ماشية
يسرى : هههههه لكن شبحتوها كيف فرحت بعدين
منوبة : و الله عندها الحق عاد انا بروحي هكي قلبي يقول عليها غير عارفة روحي توا ما عندي ليها جهد و خايفتهم يقعدوا غير واحلين فيا ... و عزيزة مازال فرحتها القدام بعد توصل لو كان تشبحوها
عويشة ابتسمت لان عندها علم : ان شاء الله رمضان الجاي الحق انا بعد جربتها في رمضان خلاص معش نقدر نصبر عليها
امل : ربي يوصلكم ثاني ان شاء الله
: ان شاء الله
الصغار كانوا كلهم يلعبوا قدامهم ...
فجاة قطع هذرزتهم صوت
خش ماجد بصوت عالي : يسرىىىىىىىى
يسرى خافت : يا ساتر
طلعت تجري
عويشة : كلا انا ما عاد عندي جهد ع الرعايش نوضي مودة اشبحي خيرهم
مشت مودة وراها
كان ماجد واقف و جايب في ايده كيس قدامها : مبروك النجاح يا بودرنه درتيها و جبتي ممتاز
يسرى شهقت : حيييه كذاب
ماجد : بارك الله فيك
يسرى حطت ايدها ع فمها مش مصدقة
جتها مودة سلمت عليها بالوجه : مبروك يسرى
يسرى : الله يبارك فيكم يا رب
و جي مفتاح : مبروك بنتي رفعتي راس خالك
و هي تبي تحضن ماجد مشت حضنت خالها
ماجد "ماهو نستاهل كنت خبرتها فوق حتى انا"
مودة : شني جايبلها
ماجد : خلي تعبرني قبل
هي تحشمت قدام خالها و قعدت تفنص فيه : كح كح احم
ماجد : سافر طاهر قعدتي انت تحمحمي و تكحكحي
مفتاح : ههههه.... تعالي يا مودة تعالي نبي فنجان قهوة من ايدياتك
مودة : انا اللي اخيرا عبرتني قبل تطلب فيها من عزيزة
مفتاح لف ايده عليها : كل وحدة و مكانها عاد ... و قهوتك انت بروحها و قهوة الخمسية بروحها و كلا دوحة طاسة الشاهي الخضراء ما نحبها كان من ايديها
مودة تمشي في جنبه : شني خليت لعويشة
مفتاح : هاديكا اي شي تديره عسل حقاني