نبدوا من عرس ندى لان كل العيلة فيه وبالنسبة لعرس صفاء و مروة ف حنمروا عليه مرور الكرام ....و نبدوه من يوم الثلاثاء ....
اللي كان ع عكس عرس عزيزة ما فيشي كسوة باعتبار عيلة العريس من طرابلس ف حتكون الاربعاء و لهذا ح تكون الليلة سهرية و حنة و العروس لابسة البودري
و نفذت لطيفة كلام امها بعد قدرت تقنع مسعود ان امها ما قالت هكي الا من خوفها ع بنتها لانها يا اما حالمة بيها او شي من هذا القبيل و الراجل رضخ لان في الاصل يكن احترام كبير لمنوبة و ندى عاد وين تلقوها قريب هبلت بعد عرفت بالموضوع
المهم في حوش مفتاح كانوا كلهم يتجهزوا ع شان يمشوا للعرس و التجهيزات كلها في حوش عزيزة باعتبار طاهر ماهناش خذو راحتهم غادي
الكناين الاثنين كانوا ح يلبسوا بدلة صغيرة لان ثاني يوم بيلاقو الكسوة في البدلة الكبيرة و مودة ح تمشي في قفطان شتوي كم لونه عنابي طويل
عزيزة : تمام كملنا ماشاء الله عليك امولة
امل وقفت ع المرايا : سلم ايديك بجديات اول مرة نطلع بالشكل هذا حلوة
عزيزة : انت ماشاء الله عليك ساد غير عيونك الله يبارك كبار و سود .. ع قولة الاغنية سود من الله ..
امل ضحكت باعجاب : ههههه سلمك يا رب احرجتيني
مودة جت من برا : ماشاء الله امل طالعة تجنني
امل : شكرا هيا خلي نبدا نلبس قبل تجي عمتي هي اللي بتلبسني الردي
عزيزة : خوذي راحتك عندك المربوعة والحوش ع حسابك
امل : صحيتي مع ان حوش عروس المفروض ما حوسناشي
عزيزة : تي بري يا ودي وينها الحوسة
امل : ماشي
خذت حاجاتها و مشت
و عزيزة بدت في روحها و مودة حتى هي طلعت تلبس برا ..
منوبة دايرة كل يوم في مكان و اليوم قاعدة عند حوش جبريل ع شان ثاني يوم تحضر كسوة ندى
و عويشة وتت روحها و مشت لحقتهم في حوش طاهر
بدت عويشة تساعد فيهم في تلبيس العربي هي و مودة لعند كملوا و كانوا كل وحدة بجمالها المختلف و شخصيتها المميزة ع الثانية اجمل من بعض يعني تشوف هذه تقول احلى و لما تشوف الثانية تغير رايك
و بكل ود و حب مودة تحوس عليهم و اخر شي جابتلهم امية رقية شربوا منها الاثنين واما عويشة فزي اي ام من امهاتنا مشت جابت الوشق و البخور و بدت تبخر فيهم
و هي في حد ذاتها تبي من يبخرها مولية زي الغزالة و التخليلة ما تكون جميلة الا ع امهاتنا ربي يحفظهم عليهم الحرير يخيل اكثر من صبية في ريع شبابها ..