واقف بجرده في فم الحوش : ناديهالي يا هناء قوليلها بوك يبيك تجيبلي الجريدة معاها تلقاها ع الطاولة في داري
هناء : حاضر يا عمي
مشت داخل وين ماالقتها تضم في حوايجها لان خلاص ح ياخذو دبشها و بيرفعوه لحوشها
كانت كل ما تحط حاجة تبكي 😭
هناء : عزيزة
هي مسحت دموعها و شحبتلها : نعم
هناء تنهدت و كانت شادة روحها بالسيف : عمي قالك جيبي الجريدة من داخل و تعالي
عزيزة شبحتلها لحظات و تذكرت ان اليوم هذا يوم الاحد موعد صدور الجريدة الاسبوعي الجريدة هذه كانت اسبوعية وقفت و سكرت الشنطة و مشت لدار امها و بوها
كانت زكية شادة في ايدها حديدة ذهب ناوية تلبسهالها هدية و تبكي و اول ما شافتها زكية نزلت راسها تهربا منها: شني تبي
عزيزة حست ان امها قلبها مش حاس بيها بكل ما كانت عارفة انها بتتقطع من البكي ع فراقها : بابا يبي الجريدة
و اهني زادوا دموعها لان فهمت ان عبدالله هكي بيسلم ع بنته لان زمان عيب البنت تسلم ع بوها سوى بالبودري او الفيلو اشرت ع مكان الجريدة
و هي تنهدت و خذتها و طلعت جنبه في الفيراندا متاع الحوش كان في طاولة و كراسي
حطت الجريدة قدامها
و هو طلع البيرو من فرملته: احم نبدو بسم الله
عزيزة دموعها نزلوا : بسم الله
عزيزة تقرا في المكتوب : افقي شعور مؤلم متكون من اربع حروف
عبدالله بدون تفكير : فراق
هي حاولت اتمالك نفسها لكن صوتها بادي يخونها : فعل متكون من ثلاث حروف بمعنى المغادرة
عبدالله : عمودي هذا صح
عزيزة : اي
عبدالله : رحل
سكر الجريدة : بنتي بترحل ع بوها ضي عيوني بتنور حياة غيري نبيك ترفعي راسي يا عزيزة ما نبي نسمع عنك كلمة بايخة في يوم لا وانا فوق الارض و لا تحت منها نبيهم يقولوا الله يرحم بوها اللي رباها راجلك تسمعي كلامه في الصغيرة قبل الكبيرة و راهو راجل معدنه ذهب و لو مش هكي ما كنت عطيتك بعيدة عني حوش بوك وانا حي تجيه امتى ما تبي و تقعدي قد ما تبي لكن لو ربك خذي امانته ردي بالك تامني للحوش هذا ردي بالك صارلك شي حيشان اعمامك مفتوحات باهي بنتي
و هي معش تحملت و حضناته و تبكي معش قدرت ترد و تقول اي كلمة غير انها تحس بالامان اللي مستحيل تلقاه في مكان ثاني شدت فيه بكل قوتها و لو الامر ليها كانت لغت كل شي
و جنب الباب زكية تبكي من وسط قلبها و حاسدة عبدالله اللي قدر يفضي ما في جعبته عكسها هي : الله يهنيك يا ضي عيوني
مع تحياتي
مارية علي الخمسي ❤️❤️❤️❤️❤️
