حرفيا ما كانت تغني بل كانت تبكي
صوتها فيه جرح
فيه بحة فيه حزن كبير
كان مش حزن عادي
كان بحر من الاحزان
ما تجرا حد يمشيلها
لان كلهم متالمين زيها و متالمين لالمها
لعند في الاخير
مشو طاهر و مفتاح واحد جي ع يمنيها و الثاني ع يسارها
طاهر : ادعيلها يا دوحة
مديحة شافت لطاهر : كنت نحلم بيها يا طاهر تجري قدامي حاولت نشدها ما قدرتش لعند ما حسيتش بروحي الا وانا في مكانها اهني
مفتاح ساندها و وقفها : هيا بنيتي مش باهي العياط في الخلا بروحك و اخر ليل تعوذي من الشيطان و خشي داخل توضي و صلي ركعتين و بعدها شدي المصحف واقري قران
مديحة : يوصلها صح
طاهر : باذن الله هي ما تبي منك شي الا الدعاء توا لانك تعذبي في نفسك وانت ما تهوني عليها
مديحة مسحت دمعتها و حركت راسها بايجاب : صح يا طاهر عمري ما هنت عليها عمري
مشو بيها للحوش لاقتهم عزيزة و عويشة خذوها منهم خشت معاهم توضت و بدت تصلي
ماجد من بعد الموقف هذا مشي لذات المكان يحرك في ايديه ع الحروف المرسومة و يبكي بالصوت العالي
يسرى من اول ما سمعوا الخبر و هي بعيدة عنه حزنها ع سارة كوم و تفكيرها في هو هم بروحه ما صدقت انها شافاته مشتله ع طول
حس بيها بدون ما يشوفها حط ايديه ع الحروف مرة ثانية : في العرس هي رسمتهم قالتلي هذا ليك انت و يسرى .. قلتلها خلاص يسرى منجيبهالك قالتلي هي بتجي و انا بنمشي "صوته تغير وبدي يبكي " قلتلها وين ؟! قالت لحوشنا ... مشت يا يسرى زي ما قالت صار مشت و معش بتولي
يسرى شدت ايده و الايد الثانية ع فمها و تبكي : مش مصدقة ماجد نحس فيه حلم شوية و تطلع و تبدا تغني و ترقص بيناتنا زي الكذبة نحس فيها يا ناري عليها مديحة ما بعدها
ماجد يخبط في راسه ع الشجرة : منهبل انا منهبل كيف بس لذغتها الافعى هذه من وين جت و مديحة وين و بوها وين و بعدين سمعت عمي يقول ان بوي هو اللي اسعفها باهي راجلها طايح السعد وينه و وقت ننشد ما حد يبي يحكيلي
هي سكتت لان غضبها ع سعد كوم و خوفها ان ماجد يديرله شي كوم بروحه
ماجد لاحظ سكوتها مسح وجهه بايديه الاثنين : انت تعرفي شي انا ما نعرفاش
يسرى تهربت من نظراته : لا يا ماجد ماهو كنت معاك انا
ماجد بسبابته اشر عليها : لالا واضح يا يسرى في شي كلهم يتهربوا وانت زدتي اكدتي اللي شاك فيه و انا مش ح نرتاح لعند نعرف
