هالنهار عليه ندور هالنهار ربيعه نور
روروروروييي
كان داخل الحوش و هو في قمة غضبه ابدا ما يشبح في اي حد قدامه و التيليفون في ايده اتصل كذا مرة و جاه الرد
: ايوا
: اطلعيلي في الفم فيسع
هي خافت من نبرة صوته و طلعت بعد حطت وشاح ع راسها وصلت فيه: خيرك شني في. ؟
: خوذيلي طريق توا توا دبري راسك قولي خوها بيخش بوها جدها عمها ما ليش علاقة المهم اني منخش و خلي اللي داخل يلبسوا
: نهاري فكنا و اقسم بالله خوتها يوروك
: و انت شني ليك علاقة انا نتحمل المسؤولية كاملة ديري زي ما قلتلك خير ما نهد عليهم بدون توقيض
: باهي باهي
خشت داخل : العريس بيخش البسو يا عيلة
كلهم متفاجئين كيف بيخش وهي خطوبة بس و اصلا امه هي اللي لبستها الدبلة عيونهم يسالوا في بعض و امها تفكر في خوتها اللي من الاول حذروها من الحاجة هادي ما كان منها غير مشت لبنتها و لبستها عبايتها و وشاح و اختها تساعد فيها
العروسة : كيف صار ؟! يما شني في ؟!كيف بيخش ؟!
: توا اسكتي و خلي اليوم هذا يمشي ع خير
العروسة خلاص بتبكي ما سد مجبورة ما سد بيخش يشوفها
العيلة لبسوا
طلعت : اهم لبسوا قولي شني بتدير؟! فكنا من المشاكل سلم خوي
دفها بايده و خش للصالة زي الطلقة و اول ما بان عليهم زادت الصدمة و خاصة ع اللي عيوو و همًا يخططوا يفرقوهم
اما هي معش عرفت تفرح و الا تبكي تلومه و الا تشكره سهمت فيه وبس حتى جاي في توتة طالع غزال كل شي قدرت تسيطر عليه الا دموعها هالمرة اللي ياما منعتهم ينزلوا قدامه و ع شانه
قدم منها و خذاها من ايدها بقوة و طلعها للدار اللي جنب الصالة و اخته طلعت تجري وراه و اول شي داره .. جبد الدبلة بقوة و حطها ع الطاولة و كان يتكلم من بين سنونه : شني لبسوك ثاني
هي كانت زي المنومة مغناطيسيا اشرت ع التاكم فكه و كان ح يقطعه من كبر النار اللي داخله و حطه ع الطاولة
اهني اخته معش تحملت و جت جنبه : هي خربت خربت حتى الحديدة و الساعة و الخاتم منهم
جبدهم و حطهم ع الطاولة طلع الدبلة اللي شاريها و لبسهالها و تكلم بصوت عالي ع شان الكل يسمع : هادي خطيبتي انا و تلبس دبلتي انا دبشكم خوذوه و روحوا تنقصكم حاجة قولوا ندفعوا حقها
صار هرج و مرج و النساوين طلعوا برا و يهددوا و يتوعدوا و هو عيونه عليها
: مازال مش مواطية عيونك مازال تتحدي فيا و مش عاجبك
: شني اللي درته هذا
: هذا حق كان ح يضيع و رديته
: انت ما عندك حق عندي لانك ضيعته بروحك
: و اليوم قررت نرده و بعدين انت مضحوك عليك و الكلام اللي وصلك كله غلط
: قداش نكرهك تقلب حياتي كيف ما تبي
: لان بدوني ما عندك حياة اصلا
: لا عندي
هو ضغط ع ايدها : لا
....
توقعاتكم مني هادو ؟!
مع تحياتي مارية علي الخمسي
