( هذا وين جاني الضي😭😭😭)
بعد سماع صوت الطق ع الباب
عوض فتح الباب و تفاجا بيها مبهدلة قدامه و تبكي : نبي فراس حول من قدامي
عوض وقف يشوفلها باشمئزاز تذكر كل لحظة وصلاته رسالة ع مرته و اول ما يروح يلقاها في ذات المكان اللي موجود في الرسالة تذكر كيف ضربها و قريب قتلها و كيف خسرت طفلها بسبب ضربه كل غله عليها تجمع في لحظة دفها بقوة : اطلعي برا يا ### مني جابك ياللي ما تتحشمي ع وجهك مازال عندك وجه تقابلينا بيه
ع صوتهم طلعوا الباقي
حمزة بغضب اكبر : انت يا كافرة كيف تجي لهني امشي اقلبي وجهك
نهى تبكي : نبي فراس خلوني نتكلم معاه انا مش جاية ع شانكم
زكية باعصاب : امشي دعوتك تقلبك ان شاء الله شني مازال تبي فيه فراس يا سحارة
عبدالله : خلاص نقصوا صوتكم ما في داعي للفضايح قدام الناس و انت يا بنتي وين اهلك و من جابك
هي داهشة : جيت ع رجليا اول ما سمعت ان فراس روح نبيه نبي نتكلم معاه ياعمي بالله عليك
فراس بتقولوا وين
كان واقف اخر شخص فيهم و ما انتبهله حد غير عزيزة شدت في ايده : فراس انت بخير؟!
فراس يتذكر في اول ايام زواجه معاها الباقي كان زي الحلم في مشاهد مشوشة و مش واضحة مش قادر يتذكرلها اي شيء خير اتذكر جلسات العلاج و المها و الوضع النفسي اللي عاش فيه تذكر ان كان حاس بالغربة بين اهله و ناسه و مش متفكر كل مدة زواجه باعد عن اخته و قدم منها
هي شافاته قربت منه و طبست ع رجليه تبوس فيهم : سامحني فراس سامحني غلطت لكن لاني خفت تتزوج عليا من لما عاينت و قالتلي الدكتورة مش ح تقدري تجيبي صغار وانا قريب هبلت قعدت نفكر و نفكر كيف نطلع من الورطة هذه و القيت الحل عن طريق بنت عمي قالتلي ع المراة هذه اللي تسحر في الاول سحرتك ع شان تنسى موضوع الصغار و بعدين عجبني الموضوع لما القيته دار نتيجة قررت نخليك تسمع كلامي في كل شي و تبعد ع اهلك انا توا ندمت و مستعدة نخطبلك بدال المراة ثلاثة المهم تردني يا فراس كل يوم صدام يضرب فيا لعند خلاص مش قادرة نتحمل نعيش خدامة ليك و لامك لكن ما تسيبني يا فراس
عوض خاف لو خوه يلين ناحيتها : انت وحدة كذابة رد بالك يا فراس تصدقها راهو هي اللي خربتلي حوشي انت واخذلها تيليفون وانا ما كنت نعرف كانت تبعثلي في رسائل ع سعاد شني لابسة و وين قاعدة و كان ما نروح نلقى الكلام صح فقدت ثقتي في روحي و في مراتي و حتى اخر مرة صار نفس الشي و بسببه انحبست و بعدين طلقت سعاد اللي خذت صغاري وانا اليوم مش عارف مكانهم رد بالك تضعف و تصدقها و تشفق عليها لانها شيطان مش انسان
نهى تبكي : لانكم تشكروا فيها ديما عمي و عمتي و عزيزة ديما هي وياها متصاحبات و يهدرزوا لكن انا ما يحبني حد و تشوفوا فيا ديما غلط لبسي غلط كلامي غلط حركتي غلط و زيادة هي متهنية و بصغارها كرهتها و حقدت عليها و كنت عارفة ان راجلها شكاك و ما يصدق يسمع كلمة عليها استغليت الشيء هذا مش بايدي انتم السبب
