هي تتفرج ع ال tv ع رسومها المفضلة اللي كيف بادية و تردد معاها في الاغنية
و امها تنادي و تعاود و لا حياة لمن تنادي
سمعها زوجها تنادي مشي لبنته و طبس عليها : توا مش تسمعي في ماما تنادي ؟ علاش ما مشيتيلها؟
هي دفت ايد بوها و مازالوا عيونها ع شاشة التيليفيزيون: امشيلها انت بابا انا مش فاضية منتفرج ع سالي من بكري نستنى فيها
ابتسم و قال: يا حبك ليها هالرسوم ما اتمليش منها
تكلمت وكلها حب : نحبها بابا اصلا حتى في حفلة المدرسة منغنيها الاغنية متاعها و الابلة قالتلي نعطيك تغني اغنية ثانية ع الام متاع يا حنينة قالتلي انت صوتك احلى صوت في المدرسة
حط ايده ع شعرها: ربي يحفظك حبيبتي
: راهو بتجي انت و ماما و خوتي تحضروا نبي نغني و نشبحلكم
: اكيد عندك شك انت؟
: وعد ؟!
هو بتاكيد : اكيد وعد
هي مدت صبعها الصغير و هو لف صبعه عليه: وعد
: ههههههه
هي : حي بابًا بدت الرسوم اشبح الانسة منشن كيف دارتلها ديما اهلي فيها تعيط شريرة هادي
هو ضحك عليها : شريرة بكل
هي : ماهو بوها سيبها عندها خزي عليها نحبهاش انا خلاص بابا نتفرج انا
هو وقف : باهي خلي نشبح امك خيرها
مشي للمطبخ : بنتك تتفرج ع السيدة سالي يعني تنسيها علاش تبيها انت؟
ضحكت: هههه نسيتها انا بكل بالله عليك دير دورة ع الصغار
: من عيوني
تن تن
صوت المسج متاع تيليفون الليلة النوعية الاصلية اقوى من اي صوت
هي شبحتله بحزن: رجعت تبعثلك ثاني؟
هو بندم : و الله ماعاد رديت عليها انت تعرفي اني درت هكي نبي نعرف مني تكون لانها عارفة كل شي ع حياتنا و وعدتك اني مش حنعاودها ثاني
هي اعطاته بظهرها و معش ردت عليه
و هو طلع و حاس روحه نادم اللي سمع كلام اقرب صديق ليه!! و ياما في من اصدقاء نحسابوهم اصدقاء وهما الذ الاعداء
لكن الغلط مش فيهم بس الغلط فينا وقت نفتحوا ابواب حياتنا الخاصة ع مصرعيه لاي حد
🤔
مع تحياتي
مارية علي الخمسي ❤️❤️❤️❤️❤️
