(سامحوني عارفة الحلقة قصيرة ع غير العادة و ما فيها احداث هلبة بس تعبانة شوية لان اليوم كان عندي خدمة هلبة و ان شاء الله ربي يقدرني و نعوضكم غدوا ❤️❤️❤️❤️❤️❤️❤️)
ندى بوجه مرعوب تماما كانت في لحظات هلع و مش مصدقة اللحظات السيئة اللي عاشتهم قبل شوية يعني الوحدة تحط اكثر من سيناريو لليلة العمر بس تفاصيل زي هذه ابدا ما خطرت في بالها .... شافت عمتها وخرت من جنبها و تشهق : نبي امي حولي خليني نروح نبي باباي حولي حولي
كريمة بخوف اكبر حاولت تشد ايدها بس ندى رعشت منها و هربت و تكمشت في بعضها بخوف كبير : ندى بنتي اسمعيني كويس ربي يهديك نبيك تفهمي الكلام اللي منقوله
ندى تحرك في راسها برفض و خوف : لالا خليني نروح بس
كريمة تبكي و تحكي و تحرك في كلتا يديها في محاولة منها تهديها و تخليها تستوعب اللي عاشاته : غير وين بتروحي بس ؟! افهميني الله يخليك عندك حق تخافي و عندك حق تحمقي مني لكن حطي روحك في مكاني ولدي مريض يقعد حاله باهي و يتصرف طبيعي لعند يشبح مراة قدامه يكون فيه عقل و طار لولا انك في السيارة مغطية راهو اشبح شني دار وقت شبحك قريبة عليه
ندى ترعش كلها : باهي علاش ما قلتيش ؟ و ليش اصلا تزوجي فيه
كريمة تبكي : ماهو ع قد ما عالجناه بدون فايدة و اخر شيخ قال لو يتزوج يبدا العلاج اسهل و الحق من اول ما قلتله عبدالرحمن عليك فرح ع شان انا فرحانة و وافق واكيد وقت تكلم معاك في التيليفون شبحتي بروحك كيف ان انسان عادي مش مريض و لا يبان عليه ان مسحور
ندى كل ذرة في جسمها ترعش من لحظات الرعب اللي عاشتهم: ما دخليش انا نبي عيالي توا خليني نروح قريب قتلني ولدك و انت حاجة زي هذه مش من حقك تدسيها
كريمة بتفهم و لانها متوقعة اللي صار: معاك حق تقولي هكي لكن افهمي الكلام قبل ! تبي تروحي تحسابيها ساهلة انت عارفة شني بيقولوا عليك الناس بوك و امك بيتحملوا حاجة زي هذه انت بتتحملي تطلع عليك الدوة
ندى بدت تخبط برجليها : وانا شني ذنبي بس حرام عليكم علاش هكي تحطي فيا في النار و تبيني ننحرق و نسكت
كريمة تحاول تشد ايديها و تهديها و ندى تهرب منها حايفة: ما فيش نار ان شاء الله انت غير اسمعي كلامي و وسعي بالك معاي و كل شي يمشي مزبوط باذن الله و اول شي توا منتصلوا بعيالك و نقولوا انك تهنيتي وانكم مسافرين يوم السبت الصبح للمغرب
مجرد ذكر اسمها خلاها تنتفض : لالا انا ما نقدرش خلي اللي بيقول اي كلمة يقول المهم نروح لحوش عيالي كلميهم
كريمة غيرت اسلوبها و بتهديد : اسمعي جاي انا مش مستعدة بعد اللي درته نخسر ولدي و معاها حتى خوي اسمعي الكلام و توا ارتاحي عبدالرحمن بيبات في الشقة الثانية مع خوه و انا بايتة معاك في الصالة تصبحي ع خير
