طاهر بضيق : ايام صعبة مش حاب نتذكرهمعزيزة: بس انا نبي نشاركك كل شي حتى الايام الصعبة نبي نعرف كل شي مر عليك و حسيته
طاهر : اذا نضمن انك ح تخليني نشاركك كل اللي عشتيه وانت بعيدة عني مستعد نقولك كل شي مريت بيه
عزيزة ارتبكت : اكيد ح نقولك كل شي
طاهر قرب منها و حط عينه في عينها : كل شي كل شي !!
عزيزة تهربت من نظراته : اكيد كل شي
طاهر : تمام نقول اللي عندي و نشبح اذا انت بتقولي اللي عندك
عزيزة : تمام
طاهر بدي في سرد تفاصيل اليوم اللي جت فيه بنته للدنيا و كيف مشي المخازن و المنظر اللي شافه و حكالها ان طول الوقت هي وبنته بين عيونه و خايف عليهم لو يوصل فيهم حد و بالذات خوتها اكيد زيه زي اي راجل في مواقف معينة في السجن تحفظ عليهم و ما حب يخوفها اكثر و يحكيلها تفاصيل : و هذا اللي صار
عزيزة باست ايده : و لا لحظة وحدة غبت فيها عن بالي كنت طول الوقت ندعيلك بين رمشة عين و الثانية النفس نفسه ولى صعب بعيد عنك
طاهر : الحمدلله ... ابتلاء من الله و ربي كان معانا و قدرنا نتجاوزوه ع خير .. توا دورك احكيلي و حطي في بالك اني سمعت من اعمامك القصة يعني ما تديريش روحك خايفة عليا و تدسي عني حاجات كل ما في الموضوع اني نبي نسمع منك
عزيزة خافت لكن هي الادرى وقت دست عليه شني صار و في نفس الوقت حابة تشاركه لكن في تفاصيل حتى هي دستها ع الكل تخص اليوم اللي خذوها فيه من حوش اهله بدت تحكي في الخطوط العريضة فقط من اللي صار من لحظة خذوها من اهني لعند وصولها للخمس و كيف اجبروها توقع ع الورق السب و الكلام اللي ع طاهر و غيره زي وينه الزاوي اللي مستقوية بيه و زي انهم قالوله نزوجوك لاول واحد احتفظت بيه لنفسها و خافت تزيد من غضبه ما كانت عارفة انهم وقت مشوله قالوا ما هو اسوء : ... و بس الحمدلله ربي بعثلي خالي يومها جاي زيارة لامي فتحنا الباب القيناه قدامنا خذاني معاه لمسلاتة و من بعدها لطرابلس لحوش عمي وين القيتني
طاهر لمها بين احضانه و كأنها طفلته : اسف اني ما كنتش معاك اسف ع كل لحظة خوف عشتيها و ع كل لحظة عجز سامحيني
عزيزة : حاشاك يا غالي انت و موجود ما يتجرا حد يخطم من جنبي مظلل عليا انا و بنتك و عيلتك كلها بس اللي صار معاك فوق طاقتك الله غالب ما عليك ملام
طاهر شد ايدها : توا نجو للمهم و انت تجاوزتيه
عزيزة بعدم فهم : شني هو ؟
طاهر : انك طلبتي مساعدة من منصور ال### خال الصغار
هي تفاحيت ان عارف : و الله العظيم ما كلمته و لا لساني خاطب لسانه طلبت رقمه صح و اعطاني ناصر الرقم اتصلنا بيه من تيليفون عمي و فهمته اني مش ح نكلمه طول قلتله كلمه انت و اطلب منه يعطيني اخته .. اي كلمت اخته و طلبت مساعدتها و هي اللي شرحتلها اللي صار معاك و الراجل بارك الله فيه ساعدنا