ماجد وصل سارة و مروح بس شاف شي خلاه يشد فرينوا ع فجاة و ركز بعيونه
كانت يسرى تمشي ع حافة الطريق بخطوات سريعة و معاها بنت وحدة البنت قصت الطريق و يسرى مستمرة في طريقها للحوش
و في سيارة تمشي وراها بسرعة منخفضة
هو كان في الطريق اللي مقابلة لف بسرعة و جي وراء السيارة و قص عليها الطريق
صوت الفرينوا كان عالي هلبة
خلى يسرى تخاف و توقف ع فجاة و وقت التفتت وقفت الدنيا قدامها لمًا شافت ماجد نازل من السيارة
هو أشرلها بايده تمشي و كانت نظرته تخوف
خذتها من قصيرها و مشت بسرعة ..
و ماجد جي للسيارة من جهة السواق و فتح الباب : تفضل؟
صبحي بقيمة حاجب : انت اللي تفضل قاطع طريقي و تفتح في باب السيارة بدون اذن ! كيف نساعدك خوي
ماجد اتكي ع باب السيارة : تساعدني وقت تحترم روحك و معش تلحق بنات الناس و الا و قسما بالله نحرقك في سيارتك
صبحي تصنع الشجاعة : وانت مني تكون ع شان انا انفد اللي تبيه
ماجد بنظرة تحدي : ما ليكش اي علاقة !!! بس البنت اللي تلحق فيها تخصني و مازال نلقاك وراها و ربي نعدمك
صبحي بخبث : يعني حتى انت ضمن القائمة
و بدون وعي بدي فيه ماجد ضرب
لعند لمحه حاتم اللي كان مروح من المحل متاع خاله درس و نزل بسرعة و جبده منه : خيرك يا راجل حول
ماجد بتهديد : اقسم بالله مازال نلقاك جاي جهتها نوريك....
صبحي يمسح في خشمه اللي ينزف : ما تخشش بيني و بينها انا متفق معاها ع كل شي يسرى تخصني وانت اللي خليك بعيد
حاتم شبح لماجد لحظات و هالمرة هو اللي هجم عليه ضرب و ضرب لعند ماجد خافه يتورط فيه فكه : حول يا راجل ما يستاهلش توسخ ايديك بيه
حاتم : قسما بالله تجي جهتها نوريك
صبحي شغل السيارة : واضح دائرتكم طابور وراها
و لحقوه الاثنين بس هو كان اسرع و هرب
الاثنين واقفين جنب بعض داهشين
حاتم اشر عليه : شني اللي صار و هذا شني يخرف؟!
ماجد : واحد وسخ و كلب لكن قبل ما نقولك عليه شي كيف تخلوها اختك تروح ع رجليها
حاتم : نتاخروا و هي ما تحبش تراجي بروحها في المدرسة تروح مع صاحباتها و عمرها ما قالت ان صار معاها موقف
ماجد توقع انها ممكن تدس ع خوتها اي شي صار معاها من نوع المضايقات هذا : انا وصلت سارة للمدرسة و مروح صدفة من اهني شبحته يلحق فيها بالسيارة و هي واضح هاربة منه تجري جري لفيت و جيته و اللي صار بعدين شبحته بروحك