طق الباب و فتح ميلاد ليصعق بوجودهم قدامه
يسرى : اهلين عمي ميلاد كيف حالكم
بحركة عفوية شبح فوق و رجع بعيونه عليها : الحمدلله كيف حالكم انتم
هي استغربت ان ما خلاهاش تخش شوية وجي حازم سلم عليه : كيف حالك عمي ميلاد
و ميلاد خلاص قلبه بيوقف من الخوف : الحمدلله شني اخباركم انتم .. سامحوني غير عمتكم
ع طلعة كريمة من داخل : ميلااااااد مني اللي... (هرب الضي)
يسرى و حازم مستغربين ردة فعلهم
كريمة بدت تلكلك و عيونها فوق ع شقة ولدها عبدالرحمن
يسرى :كيف حالك يا عمتي
كريمة بدت تبلع في ريقها بخوف و تشوف لميلاد و مش عارفة تتصرف : الحمدلله انستو سامحونا غير عندي حماتي شيبانها توا توا توفى هذا علاش متلخبطين
و هذه دعوة صريحة للمغادرة و عدم الترحيب بهم.... و يسرى و حازم مش فاهمين شي
بس يسرى زي عادتها : تي غير سلمي علينا قبل يا عمتي جايين من طريق طويلة رانا
كريمة حاولت تهدي روحها و تسلم : سامحوني ما هو عاد قلتلكم من الرعشة و الله لعند ركابي فشلوا
يسرى تسلم : معليشي معذورة
و سلمت ع حازم : كيف الحال عمتي
كريمة : الحمدلله
حازم : اي شني اخبار عبدالرحمن وندى يكلموا فيكم
كريمة: اي يسلموا عليكم هلبة
هذا كله و يسرى مستغربة انهم مخلينهم واقفين في الباب
حازم : معناها اعطوني الرقم غير امي شادتها وراي مشغولة عليها و تبي تكلمها
ميلاد حاول يتدخل : هما ما عندهمش رقم كل يوم يكلمنا من مكان
حازم شاف ليسرى باستغراب : باهي مكان خدمته اقل شي نتصلًوا بيه احني و نقولوله يخليها تكلم امها
ميلاد في رد سريع : ماهو انتقل و مازال ما ثبتش في عمله اول ما نحصلوا منه رقم ثابت نكلموكم
حازم حس ان في شي : باهي شوية ممكن امي باعثتلها حاجات تحطيهم يا عمتي في شقتها
كريمة : باهي باه
يسرى: نساعدك تضميهم فوق
