سلام ليكم
نزلت الحلقة بكري لان عندي عرس ❤️❤️
منوبة حست بشوية تعب فاضطرت عويشة تاخذها و يمشوا للصالونات اللي في اللوبي متاع الفندق و يجلسوا غادي اما ..
مودة شبحت عزيزة جتها مبتسمة : اهلين عزيزة حمدلله ع سلامتكم
عزيزة : الله يسلمك هادي ماما
زكية كانت تخمم في فراس بس واخيرا لاحظت ايد مودة قدامها جاملت فوق من النفس : اهلين بنتي كيف حالك؟
مودة : الحمدلله تعالو قعمزوا جنبنا غادي احسن من واقفين اهني حتى احني نستنو في بابا و خوي
عزيزة شبحت لامها تستنى في ردها
زكية اضطرت توافق لانها تعبت من الوقوف : هيا امشي يا عزيزة
عزيزة فرحت و شدت في ايد مودة و مشو مع بعض
: السلام عليكم
: و عليكم السلام
مودة و هي فرحانة : هادي عزيزة تعرفت عليها في الطيارة و هادي امها و هادو جداي و امي
عزيزة سلمت ع منوبة : كيف حالك يا خالتي و لا باس عليك و باست ع راسها
و منوبة ماتت فيها عجبتها لين خلاص من الاول و زادت بلقطتها هادي : الله لا يوريك باس شوره رد عليا التعب
عزيزة : ما تشوفي شر ان شاء الله
و مشت سلمت ع عويشة بالوجه: كيف حالك خالتي
عويشة تفصل فيها تفصيل : الحمدلله
زكية سلمت ع منوبة و حمدتلها بالسلامة و من بعدها عويشة
قعمزوا جنب بعض ع الصالونات و بدت رحلة التعارف من جديد
عويشة : يعني انتو من الخمس نفسها المدينة
زكية عيونها ع باب الفندق : اي يا وخيتي منها
منوبة : زمانات كنا نمشو انا والحاج الله يرحمه لعيلة غادي في الخمس يقولولهم عيلة ال### بس مش في المدينة يسكنوا منطقتهم بروحها ع البحر
زكية : اي بالله الخمس كبيرة حتى هي و فيها من كل مكان
عويشة : الناس كلها خير و بركة
زكية مش معاهم بكل ع اعصابها
و في الاخير شافت فراس ساندينه عبدالوهاب و طاهر مركبينه فوق
زكية بدت تبكي : حسبي الله و نعم الوكيل
في اللحظة هادي الكل انظارهم توجهت لباب الفندق و شافوا المنظر
عزيزة شافتهم من الظهر بس ما شافت وجوههم و لا هما شافوها وجعها خوها رغم سلبيته معاها بس ع الاقل ما اذاها زي باقي خوتها دمعتها نزلت حارة ع حالته
