اول ما وصلوا ماجد و محمود
رن تيليفون محمود وقف ع جنب الباب ع شان يرد
اما ماجد تلاقى مع حازم طالع من الحوش : اوووو اهلا اهلا تفضلوا
ماجد : اهلين يبارك فيك و مدله الاكياس اللي في ايده
حازم خذاهم منه : تي غير علاش الجو اهوا ما في داعي ليه
ماجد : و الله تبي الحق عارفة انا جو زايد لكن قلت ندير فيك خير بالك يثمر
حازم قام ايده ع اساس بيضربه
و ماجد وخر ع اساس خايف : غير لا يا
حازم : صيام صيام هنيلي روحك وانت ما تقدر تسكت بكل
ماجد : الله غالب
حازم مشي للحوش بيدخل الاكياس
و ماجد شاف ع يمينه ورد 🌹 جميل و ريحته حلوة منظم بطريقة جذابة جنب المدخل متاع الحوش من داخل يعني في جنان الحوش طبس و حط ايده ع وردة بيقطفها
: لاااااااا
ماجد جي واقف : سلام قولا من رب رحيم
يسرى بتهديد من الروشن متاع المطبخ لان يفتح في الجنان و طبعا الحوش نظام حوش الشعبيات اكيد شايفينهم و تخيلتوا المنظر : اقسم بالله تحط فيها ايدك نوريك
ماجد قام حاجبه: قصدك انت مغرستهم
يسرى : اذا عجبك انا و ممنوع حد يحط ايديه عليهم
ماجد شبحلها و ابتسم ابتسامة شريرة : و الله عندي مشية لحوش عمي بعدين وكنت حاير شني ناخذ ع شان نرضي صفصف مشكورة بنت عمتي
يسرى : نهارك مغبر تحط ايدك عليها لاني وقتها مش ح نرحمك و بعدين ناقصني انا ورداتي الحلوات يمشوا للشريرة متاعك
حازم ما عجبه وصفها : توا علاش الغلط شني دارتلك هي خليك معاي انا
يسرى : لا معاك لا معاها خلي وريداتي في حالهم
سمعت صوت حازم طالع سكرت الروشن و خشت و ماجد مازالو عيونه عليهم
حازم : رد بالك تقربهم والله يسرى مستعدة تقتل حتى ع خاطرهم
ماجد : صار قلت تقتل ع خاطرهم
محمود : السلام عليكم
حازم: وعليكم السلام انستنا تفضل
محمود : زاد فضلك
ماجد : مني اتصل بيك
محمود و هو ماشي في اتجاه المربوعة : هذا احمد يسال ع البضاعة الجديدة
خشوا داخل جنب مسعود اللي رحب بيهم بحرارة و شويا و جتهم عمتهم : يا والله نهار مبارك اللي فاطرين عندي اولاد الغالي
