و خشوا..... و زكية في قولة ماشاء الله ع الحوش ...
زكية تتفرج ع الحوش : ماشاء الله ماشاء الله ان شاء الله تعمروه بالاولاد و البنات
و عويشة عاد فرحانة ان ولدها داير حوش الله يبارك : سلمك ان شاء الله يا حنه و الله ولدي ما عقب جهد حتى المربوعة دارها
زكية : ماشاء الله ربي يهنيهم فيه و يردله التعب راحة
عويشة : ان شاء الله يارب تعالي ندهورك في الحوش
مشت و معاها سلفاتها و مرة خوها و خواتها و حماتها و عويشة تشرح في كل حاجة
و البنات مشو مع عزيزة لدار النوم ع شان يساعدوها تغير
في دار نومها
بدت عزيزة تغير و لبست قفطان واخذاته نظام خليجي كم و مطرز
هناء : توا من كثر الحوائج اللي عندك ما لبستي الا هذا اللي يخنق تي انت عروس
عزيزة تلبس بدون ما ترد و هي خلاص بتنفجر
هناء شدتها من ايدها و هزتها : نكلم فيك
عزيزة بدت تبكي و معش تحملت : منموت يا هناء طلع ملتزم زي حمزة و كل شي ممنوع مش عارفة كيف نتصرف و اعطاني مهلة نفكر فيها من وقت ما عرف ان انا مش حابة نلبس زي ما هو يبي يعامل فيا باستفزاز
هناء و كميلة الاثنين اتصدموا باللي سمعوه لانهم الادرى بمعاناة عزيزة مع حمزة خوها قعدوا ساكتات و يشوفولها كيف تبكي لعند
هناء بعد تفكير : اسمعي دبارتي و ديري زي ما نقولك زي ما كنتي عايشة حياتك كيف ما تبي من وراء خوتك ديري نفس الشي قدامه قوليله حاضر و من وراه عيشي حياتك كيف ما تبي
كميلة : 😱😱لاااااا هناء خيرك انت هبلتي هذا راجلها راهو فيها طلاق مش لعب فرخات ترا قعمزي و هني روحك عزيزة ردي بالك تديريها لان لو عمي سامحك ع شان يحبك الراجل حتى لو كان ميت فيك انك تلعبي من وراه هذه كبيرة و مش ح يتعامل معاك زي عمي
عزيزة : معاها حق و غمزت لهناء
اللي سكتت طول
كميلة : ايواه خليك عاقلة لان نهاية الموضوع بعدين صدقيني مش خير بكل و حتى عمي تفكري كلامه و كيف وصاك راهو لو درتي حاجة من وراه اتنزلي راسه مع الناس
عزيزة تاثرت صح بكلام كميلة لكن من جهة ثانية مش مقتنعة تعيش بالطريقة اللي يبيها طاهر و قررت تستمر في سياستها السابقة في الخفاء افعل ما تشاء !!!
هناء : باهي بصفة عامة يعني فوتي قصة الالتزام شني رايك فيه؟!
عزيزة سرحت و تكلمت لاشعوريا:
العين قبله فرسان شوق يا ما شافت
و الروح قبله في غيره ياما هامت
لكن بعده العين انعمت وماعاد شافت
والروح من بعد شافاته ما عاد هامت
