ما هي الا لحظات و تعالت صرخاتها : قتلوهم و قتلوني معاهم قتولهم و قتلوني معاهم
انفتح الباب من قبل مسعود اللي مسبقا توقع اللي صاير و لحقوه الباقي
صرخاتها كانت عالية
يسرى حالما شافت بوها جرت عليه و شدت ايديه الاثنين : باباي ورداتي ياسميناتي باباي قتلوهملي محروقات حرق 🔥 مني دار فيهم هكي
مسعود شاد ايديها : وسعي بالك يا بنتي باذن الله ينوضوا من جديد و لو ما ناضوش نجيبلك غيرهم
يسرى سيبت بوها و قعمزت قدام الورد : لا معش نبي غيرهم لو هادو ماتو خلاص بموتهم يعني موتي
لطيفة : من غير هبال عاد نوضي فوق و خشي داخل عيب قدام اولاد خالك
هي لفت و اعطاته نظرة سم : يارب يموت اللي قتلهملي يا رب يموت
هو قريب مات اصلا من نظرتها يا بال دعوتها قسمت قلبه نصين وجعاته منها و انوجع عليها ندم اللي مسهم من الاصل نزل راسه و سكت
حازم جاها خذاها من ايدها : تعالي داخل
يسرى عيونها ع الورد و تبكي : حتى ياسمينتي ماتت يا حازم حتى هي ماتت خلاص
حازم : خلاص قلنا خشي معاي بس
خشت داخل قعمزها وسط الحوش
لطيفة : معليشي سامحونا بنتي مهبولة بالوردات متاعها وليهم كم يوم مش عارفين شني صايرلهن بوها ما خلى علاج و ما جابه بدون فايدة
محمود : معروفة يسرى من يومها متعلقة بالورد ما في داعي تتأسفي يا عمتي
ماجد كان حزين عليها: من شني صارله هكي يا عمي يعني معقولة هكي يموت لان حد قطع منه ورد
مسعود : لا يا ماجد مستحيل لان العود متاع الوردات محروق حرق انا ما عرفتش تقول اشبح شني صابين عليه يا ولدي حاجة مش مفهومة فجأة هكي صارله ليا كم يوم مدرق عليها ع اساس نحل الموضوع بدون ما تعرف لكن شكلها وقت عرفتني طلعت جت تشبح فيه
ماجد عيونه بس ع الورد حس بوجعها عمره ما توقع ان علاقتها بورداتها بالعمق هذا يحسابه كلام تقول فيه و خلاص
حازم طلع من داخل : تفضلوا شباب
خشوا المربوعة و الوضع كان غريب
يسرى سيبت الصالة و مشت لدارها هي و اختها و رقدت في فراشها و تبكي
ندى : شبحت الورد؟
لطيفة بحسرة : دارت هبال برا ربي يستر
ندى : غريبة توقعتها تدير اكثر من هكي
لطيفة : شني مازال اكثر من هكي
ندى : مش عارفة لكن حسيتها ما دارت شي
