عزيزة : ما نقدرش لاني تورطت معاه خلاص يا يسرى
يسرى ابتسمت ع جنب : 😏😊 صار احرف من ورطتي انا
عزيزة بخيبة امل : شني ندير و هوا خلاص وصل الموضوع عنده للشك وقت القاني دايرة فيها نانسي عجرم و حبيبي قرب بص و بص بص
يسرى : 😂😂😂😂😂😂
لعند رقدت ع الارض و هي تضحك و تصك برجليها
و عزيزة طارتلها منها : خلاص وانت ما صدقتي شني هذا
و يسرى تضحك اكثر و تكرر في الاغنية : زعلان ازعل نص نص
عزيزة معش قدرت تشد ضحكتها : ههههههههه
لحظات استمروا يضحكوا مع بعض
و يسرى سكتت : اسمعي خاطري في حاجة و نبي نديرها ناكلها لان دماغي ما يتعدلش الا وقت نديرها لكن نهارك احرف تبدي في جو الضحك و التعليق
عزيزة : خيرك انت نوضي للمطبخ و ديري اللي بتديريه و انا منطيب الغذي و ناخذه لحوش عمي اكيد متنكدين و ما خاطرهمش يطيبوا اتفقت انا وامل هي بتدير المحشي غادي وانا ندير كسكسي
يسرى تنهدت : اااااااه يا قلبي و بس ايوا اتفقوا يا كناين حوش خالي هكي اللعب عاد باش تبدا عويشة تشكر فيكم
عزيزة دفتها قدامها : مازال انت بس تخشي للفريق
مشت للمطبخ دورت بكرج حطت فيه الحليب و الكاكاو و السكر: مش باين !!
عزيزة تجهز في الخضرة ع شان الغذي شافتلها بفضول : شني بتديري ؟!
يسرى قامت ايدها فوق بملل : شني قلنا خليني نفتلك برنامجي من غير اسئلة
عزيزة : ماشي لكن بعد درتي كاكاو و حليب احسبيني معاك لاني عندي ليه وصفة خاصة
يسرى : باهي البكرج كبير اصلا
عزيزة تطلع في اللحم و بدت تقرض في البصل ع شان تدير البصلة لانها ح تدير كسكسي
و يسرى كملت: عندك بشكطي ؟
عزيزة العيون قلوب : اي شوفي بروحك في الثلاجة و احسبيني معاك
يسرى : شكلك قفاصة في كل حاجة احسبيني معاك !
عزيزة : تي غير هيا من غير جو
يسرى : اوووف باهي المهم فكينا من التعليق بعدين
صبت الحليب و الكاكاو في فنجان كبير و عطتهولها و خذت من باكو البشكطي ليها و مشت للجهة الثانية من المطبخ و اعطتها بالظهر ع شان ما تشبحها
و عزيزة بسرعة غسلت ايدها و خذت الباقي من البشكطي و بدت تكسر فيه في الفنجان بالكاشيك و عيونها قلوب لان من يوم تزوجت طاهر ما داراتاش
كل منهما عاطية الثانية بالظهر و تاكل و في لحظة غلبهم الفضول كل وحدة تبي تعرف الثانية شني تاكل لفوا في ذات الوقت و ينصدموا لانهم ياكلوا في نفس الكوكتيل
