كانت المفاجاة ان طاهر طلع من المربوعة و استغرب الشناطي و قبل ما يقول اي كلمة
طلعت عويشة لانها ما قدرت ترقد بكل من التخميم : خلاص يا بنتي
امل بحزن : هذا حد النصيب بيناتنا يا عمتي سامحوني و زي ما فهمتك اطلبيلي السماح من عمي بالله عليك والله ما عندي وجه نرفضله طلبه لاني عارفاته بيقولي ما تطلعي من حوشك و هو اللي يطلع بس مهما كان اللي داره محمود في بيناتنا عشرة و ما نرضى ان يتقاطع معاكم بسببي
طاهر يسمع فيها و في سره يقول كيف الواحد يفرط في زوجة صالحة زيها .. هو يتجنب في الاحتكاك المباشر بيها لان ملتزم بس كان يحترمها لان تربيتها في صغارها واضحة و معاملتها لاهله واضحة : استهدي بالله يا مرة خوي و صلي ع النبي و خلينا نشوفًوا الموضوع مع العيلة قبل ما يجي منها تطلعي بدون علم حد و خاصة زوجك
امل عيونها دموع : سامحني خوي طاهر اني نردك و الله يعز عليا نردك في اول طلب طلبته مني بس انا عارفة روحي لو استمريت مع خوك لا ح يرتاح هو ولا انا و لا الصغار ولا حتى انتو يعلم ربي كيف مروا عليا الايام اللي فاتو و انا نستنى في بيان ماجد و الحمدلله تم ع خير و توا يا ريت تعذروني و تعطوني السماح
عويشة حضنتها : باذن الله مرجوعك لحوشك يا بنتي
امل معش حبت تناقش عمتها مهما كان اكيد تبي حوش ولدها يقعد عامر و صغاره معاه : نشوفك ع خير و سلمي ع جداي و ع البنات و عمي
عويشة تمسح في دموعها : يوصل في حفظ الله حتى الصغار ما سلمت عليهم
امل : مش ح نقطعهم عليكم يا عمتي في كل وقت تبيهم يجيهم واحد منكم وًانا مش ح نرفض
عويشة : اصيلة يا بنتي
جت امل بتقيم الشناطي
عويشة. : خليهم توا يطلعهم طاهر
امل وزعت نظراتها ع الحوش : في امان الله
و طلعت و قلبها مكسور و روحها محروقة حرق 🔥
عويشة : اااااااه يا رب ما يبدا اسمي عويشة لو خليت غيرك تاخذ مكانك
طاهر مش راضي ع كلام امه بالطريقة هذه بس سكت لان عاذرها و عارف ان امل واجعتها خذي الشناطي و الحقهم
امل فتحت الباب و ركبت و دموعها معش بو يوقفوا و صلاح قريب ينفجر و متمني يوصل في محمود يفش غله فيه ...
ع طلعة طاهر بالشناطي: السلام عليكم
صلاح يتكلم فوق من نفسه : و عليكم السلام
طاهر : سامحنا يا صلاح و باذن الله سوء تفاهم و ينحل
صلاح بعصبية واضحة: ما في شي ينحل بينا خليه يعطيها حريتها بس هذا ما نبو منه و الباقي مسامح الله الغني و مشي لسيارته فتح البوكس حط الشناطي و رجع ركب مكانه و طلع بسرعة
