عزيزة سمعت صوت السيارة ولان طاهر متصل بيها و مبلغها ان قريبا يوصل
طلعت ع طول و شافت كيف محمود نازل و طالع يجري حست قلبها ح يوقف من الرعب
رجعت للحوش و خذت سند في حضنها و شدت سندس في ايدها و تجنبت الدخول لحوش العيلة لان مش حابة ترعشهم و مشت لشقة امل طقت كذا مرة
اخيرا فتحت : خشي
خشت عزيزة
و امل قدامها تمشي في عجلة لان ولدها يعيط قعمزت خذاته ترضع فيه
و عزيزة بعد سلمت ع سعيدة حطت سند و سندس طول مشت للصغار تلعب : شني صاير
امل ترضع في ولدها : مش عارفة محمود رن تيليفونه و طلع يجري معش عرفت شني صار حتى امي قالتلي ما ترضعيش يونس ( البيبي اسمه يونس سماه محمود ع اب امل ) و هو قدامك في عيطة وحدة
عزيزة : محمود خذي معاه طاهر و طلعوا و عمي من بعد كلمته ع مديحة نبيه يطمني عنها معش رد عليا ... امل حسني خفت كما يطلع هذاكا اشبح شني داير فيها
امل شدت ولدها فوق تطبطب عليه : وووه عليا فكيني بالله عليك مش ناقصة انا بروحي من بكري نغلي
سعيدة : اذكري الله انت وياها
: لا اله الا الله
وقت طلعوا طاهر و محمود يجروا بسيارتهم لعند داروا وراهم غبرة لاحظهم هاني و ع طول وراهم
وصلوا للمستشفى وراء بعض
يجروا بدون عقل و لا تفكير في شي كل همهم يلحقوا ما امكن ان يلحقوا به
سالوا ع بوهم
الممرضة اللي في الاستعلامات : في الطواريء
مشو و هاني وراهم
هاني اللي ع قد ما شال في قلبه عليها لكن عمره ما تمنى يشوفها بالحالة هذه وقف جامدا في مكانه متسمر و لسان حاله يقول يا ريت نقدر ناخذ نارك ننحرق بيها وانت تقعدي بخير
مديحة كانت تفرفش بين ايدين بوها : بنتي بنتي يا باباي بنتي بنتي جيبولي بنتي نبي بنتي ااااااااه شني درت في روحي انا يا ريتني ما جبتها معاي
التقوا عليها خوتها مش فاهمين شي
طاهر : مديحة اذكري الله وخيتي و فهمينا فهمنا انت يا بوي
مفتاح مش قادر يتكلم يأشر بايده مرة و يحطها مرة ع راسه و مرة ع فمه : لدغتها .. سارة لفعة هذا اللي فهمته بنتي بناتي الاثنين بيضيعوا مني هما الاثنين يا طاهر
محمود ايديه الاثنين ع راسه : يا ساتر يا رب من وين جتها بس مديحة انت حوشك ديما نظيف و مرتب من وين جاتك
واهنئ غاب العقل تماما بدت تعيط و تريش بدون وعي و الناس كلها تشحبلها بوجع
: منه هو بوها اللي اسمه بوها هواااااا اللي جابها قلتله ما نبيهاش هوا جابها هوا دعي ع بنتي بالموت يا طاهر هو نبي بنتي جيبولي بنتي
