نبدوه من حوش مفتاح ..ريحة السفنز و الشاهي و القهوة تفوح من المطبخ
و عاد من يكره سفنزات عمتكم عويشة زي العسل اللون احمر قريب برتقالي و زي النشافة من الوسط و الحواشي يتقرمشوا 😋 نايضتله من الساعة سبعة ترمي فيه و العجينة عاد الفجر ..
و الجو اللي بادي يسقع ما في احلى منه في هالوقت ..
معاها يسرى في المطبخ ايد بايد و البنت هذه ع قد ما تنق و ما تحبش المطبخ لكن وقت تنوى حاجة زي النار فيسع ما تكملها و حاجتها زي العسل
اما مودة تضم في الحوش ليه ليه بعد دوشت لصغار محمود و غيرتلهم حوايجهم
طاهر كيف فايق لان رجع رقد بعد صلاة الفجر اما ماجد في سبات عميق
و محمود طبعا فايق من وين و في المربوعة جنبه مؤيد ولده و بوه
مودة : صباح الخير
طاهر سكر باب دارهم : صباح النور
مودة : مازال راقد ان شاء الله
طاهر يسكر في ساعته اللي عيون مودة عليها طول الوقت : اي
مودة: مش عارفة نبي نكمل ضمان و هو ديما معطلني
طاهر : توا فوتيه احسن ما ينوض طايرتله ويفش غله فيك
مودة مش قادرة تقيم عيونها من ع الخاتم : قولتك ننزل نعاونهم في الفطور احسن
طاهر لاحظ نظراتها و حاول يتصرف عادي و دفها قدامه: هيا انزلي قبلي و اشبحيلي الطريق
مودة ضحكتها حركته: ههههه ناقصنا وين حوش بو سعدية
طاهر : و علاش ناقصتنا احني فيها تبي نقولها وانت تردي عليا
مودة : اووو لالا مش مصدقة يا طاهر معقولة تديرها
طاهر ضغط ع اكتافها : خيرلك راهو من امس تنابشي
مودة ضحكت ثاني : ههههه من محبتي ليك و الله
طاهر: عارف حتى انا ... و ع فكرة متبادلة راهي
مودة لفت بوجهها و هي ع الدروج و ابتسمتله و هو بادلها الابتسامة و اشر ع الدروج : اشبحي قدامك عن تطيحي
مودة شبحت قدامها : ما تخافش انطيح و نوقف من جديد
كلمة عادية ما كانت عارفة ان الطيحة قريب بس مسالة النهوض منها ممكن تاخذ وقت طويل !!
مودة : يسرى في المطبخ لو بتمشي لجداي تصبح عليها
طاهر : و انت قلتيها خلي نمشيلها
مشي طاهر لوسط الحوش وين ما موجودة جداه و مودة للمطبخ
: صباح الخير جداي
منوبة : صباح النور يا حنى وينك حتى منباركولك من امس ما شبحناك
مفتاح اللي كان متكي جنبها يتفرج ع صباح الخير اول جماهيرية : متحشم يا امي خليه