( نزلتها بكري ع شان حبيبنا اللي قعدنا مشتاقينا)
طاهر فاق من نومه و دوش و غير و طلع من الحوش بعد ما استاذن عن طريق مديحة لان عارف بوجود عمته و بنتها في الحوش
طلع برا و قعمز جنب بوه في المربوعة
مفتاح : يسلم عليك الحاج عبدالله
و طاهر حاول يكون عادي بدون اي ربكة : عليك و عليه السلام كيف حاله
مفتاح : حاله باهي قالي سلملي ع ولدنا معش قايل نسيبنا و راهو تفاهمت معاه ع يوم الخميس نمشوا نتموا الموضوع
طاهر ظلمت عنده : بس انا يا بوي نبي نستنى شويا قررت نصبرشويا بعد اللي صار كنت قبل مش مدور و مسكر راسي ع اني نخطب بنت عمي لكن بعد كلام ماجد و عمي قدام اعمامي حسيته موقف كبير و خايف نخسر خوي من وراه
مفتاح فنص فيه: خيرك يا طاهر معقولة بتوخر توا بعد الكلام اللي اعطيته للراجل عهدي بيك قد كلمتك شني تحسابه لعب صغار
طاهر حس بالاحراج من كلام بوه: مش هكي و عمري ما نوخر بس قصدي انأجل الموضوع شويا لعند نحاولوا انحلوا موضوع ماجد حتى امي طلبت منها ما تقول لحد ع الموضوع
مفتاح: لكن انا قلت و نهيته خلاص و الموضوع هذا زي ما قالت امي يبي حسم من الاساس و ما نقدرش نحسمه الا هكي وقت انت تخطب نعرف راي جبريل و شنو بيدير يا يخليهم في حالهم و يكملوا يا اما ماجد يسكر الموضوع و يشوف مكان ثاني و تمت
طاهر : بس يا بوي انت بروحك شبحته ماجد وينه اهو طلع من الحوش غير ع كلمة قالها ان مش ح يكمل معناها لو سمع اني بنخطب شنو بيدير؟!
: منرقص ع النوبة يا شيخ حتى لو قلتلي حرام هذا عهد عليا
طاهر تفاجا بماجد و كذلك مفتاح
طاهر وقف : ماجد اسمعني راهو مش زي ما فهمته الموضوع
ماجد حط ايده ع كتفه : توا خلينا من الكلام الزايد و احكولي منو اللي قدرت تخلي الشيخ يتنازل و يخطب !!
مفتاح فرح بردة فعل ماجد : وحدة خمسية تصدق يا ماجد
طاهر تحشم منهم : انا احسن شي نمشي ع حالي
: هههههههه
طلع من الحوش و ركب السيارة و تحرك بيها
ماجد هدى ضحك: تحشم شبحته!
مفتاح : ههههه اي و بدي يحكيله في القصة كيف صارت من بدايتها في السعودية و كيف خطبها طاهر بدون علم بوه
ماجد : طاهر دار هكي يا سبحان الله
مفتاح بجدية تامة: ماجد قولي خوك طلب ياجل موضوعه ع شانك مع اني عاطي كلام للناس ان منمشوا نديروا فضانية الخميس هذا،، خذي نفس و كمل انا يا ولدي طول عمري نخدم ع حاجة وحدة وهي انكم لا تكرهوا بعض و لا تتقاطعوا و لا تحقدوا ع بعض فلو حقا حاجة زي هذه بتكون السبب عندي استعداد يقولوا مفتاح ال### ما عنداش كلمة و لا تخسروا بعض
