ဗီလိန်ရဲ့ လမ်းပြကြယ်

အပိုင်း(၁၀၄)

Unicode
ချောင်လန်ကတော့ ဘာတွေဖြစ်နေတာလဲဆိုတာ မသိခဲ့ဘူး။ ဦးလေးချန်က နောက်တစ်ခေါက်သူမကို လာကြိုတော့မှ လော့ညန်တို့မိသားစုမှာ တစ်ခုခုဖြစ်ခဲ့တာဆိုတာ သူမသိတာ။

ချောင်လန်က ထန်းမော့မျက်နှာကို အလိုလိုကြည့်မိသွားတယ်။ ထန်းမော့က ပေါ့ပေါ့ပါးပါးပဲ ပြောလိုက်တယ်။ " လော့မိသားစုရဲ့ စားသောက်ဆိုင်က ကျန်းမာရေးအဆင့်က သတ်မှတ်ထားတဲ့ စံကိုမကိုက်ညီဘူး။ ဟိုတလောတုန်းက သတင်းတွေထဲမှာ ပါလာတယ်။ "

" အာ....... အဲ့တာဆို အဲ့တာကြောင့်ကိုး။ " ချောင်လန်က ပြောလိုက်တယ်။ ပြီးတော့ ခဏလောက်တွေးပြီးသွားတော့ ရပ်လိုက်တယ်။ သူတို့ရဲ့ ကိစ္စအကြောင်းကြားပြီးတော့ သူမစိတ်ထဲမှာ စကားလုံး၂လုံးပဲ ပြောစရာရှိတယ် 'တန်တယ်' ဆိုတာပေါ့။

နောက်ဆုံးတော့ ထန်းမော့က ချောင်လန့်အတွက် အရာအားလုံးကို ကိုင်တွယ်ဖြေရှင်းပြီးသွားပြီ။ သူက သူမကို ဂရုစိုက်စောင့်ကြည့်ပေးဖို့ လူတစ်ယောက်တောင် စီစဥ်ထားသေးတယ်။ အရာအားလုံးလဲ ပြီးသွားရော သူနဲ့ချောင်လန်က ဆိုဖာပေါ်မှာ တူတူထိုင်ပြီး ရုပ်ရှင်တူတူကြည့်ကြတယ်။

ရုပ်ရှင်ပြီးခါနီးမှာ ထန်းမော့က ရုတ်တရက်ကြီး ပြောလိုက်တယ်။ " ငါအချိန်ခဏလောက်တော့ ဒီမှာ မရှိလောက်ဘူး "

ချောင်လန့်မျက်လုံးတွေက တီဗွီကြည့်နေတာကို ရပ်လိုက်တယ်။

အခုတလော ထန်းမော့က ကျောင်းကိုမလာဘူး။ ရက်၂၀လောက်တောင်ရှိနေပြီ။ အဲ့အချိန်အတွင်းမှာ တစ်ခုခုဖြစ်လာတော့မယ်လို့ ဘာလို့လဲမသိဘူး သူမ ခံစားနေရတယ်။

ထန်းမော့စကားတွေက သူမသံသယတွေကို အတည်ပြုပေးလိုက်တယ်။

ထန်းမော့က ပြောတယ် သူက အချိန်ခဏလောက်တော့ ဒီမှာမရှိလောက်ဘူးတဲ့။ တစ်ကယ်လို့ သူဒါကို တစ်ခြားတစ်ယောက်ယောက်ကိုသာ ပြောရင် သူတို့က ထန်းမော့က ရက်အနည်းငယ်လောက် ခွင့်ယူတာလို့ပဲ တွေးလိုက်မှာလေ။ ဒါပေမဲ့ ချောင်လန်ကတော့ ဘာလို့လဲမသိဘူး ဒီလိုမဟုတ်လောက်ဘူးလို့ နည်းနည်း ခံစားနေရတယ်။