အခန်း [ ၁၀၄ ]
သိုက်ယီးရန် တမင် ရန်မူနေသည်မို့သာ လုမန် ပေကတ်ကတ်လုပ်နေတာဖြစ်သည်။
ကိုယ့်အပေါ်ကောင်းရင် ကိုယ်ကလည်း ပြန်ကောင်းမည့် သူမျိုးပါ။
သို့သော် ယဲ့ရွှမ်းရွှမ်း၏ အတို့အထောင်လုပ်မည့် မျက်နှာကို မြင်လိုက်ရသည့်အခါ အော့အန်ချင်စိတ်ပါ ပေါက်သွား၏။
“ သိုက်က သူဌေးနဲ့ ကြိုချိန်းထားပြီးပြီလား ”
လုမန်က တုတ်တုတ်မျှမလှုပ်ဘဲ မေးခွန်းပြန်ထုတ်သည်။
“ နင့်စကားက ဘာလဲဟ၊ ရယ်စရာကောင်းလိုက်တာ၊ မမလေးသိုက်က ဘာဖြစ်လို့ တွေ့ဖို့ကြိုချိန်းရမှာလဲ၊ သူဌေးဦးလေးကိုယ်တိုင်ခေါ်လာတဲ့ဟာ၊ သူဌေးနဲ့လည်း အသိတွေ ”
ယဲ့ရွှမ်းရွှမ်းက သရော်သလို ကြည့်သည်။
သိုက်ယီးရန်မျက်နှာမှာတော့ ယဲ့ရွှမ်းရွှမ်းပြောလိုက်တာကို နှစ်ထောင်းအားရဖြစ်နေသည့် ဆောင့်ကြွားကြွား အပြုံးနှင့် ဖြစ်၏။
“ အပိုတွေကွန့်နေစရာမလိုပါဘူး၊ တွေ့ဖို့ မချိန်းထားရင် မချိန်းထားဘူးလို့ပဲ ဆိုလိုက်စမ်းပါ၊ သူဌေးက တွေ့ချင်သလားဆိုတာကိုတော့ သူ့အစည်းအဝေးပြီးတဲ့အထိ စောင့်ကြည့်ပြီးမှပဲ ပြောလို့ရမယ်၊ ကျွန်မက ပြောသွားတဲ့အတိုင်း နေနေတာ၊ သူဌေးက စောင့်နေဖို့ ပြောသွားလို့ပဲ၊ သူဌေးကိုယ်တိုင် ထွက်သွားဖို့ ပြောတာဆိုရင် ဘယ်သူ့ကိုမှ မေးခွန်းမထုတ်ဘဲ ပါးစပ်ပိတ်ပြီး ထွက်သွားပေးမှာပါ၊ ပြီးတော့ ဒီက ဝန်ထမ်းဖြစ်တာနဲ့ပဲ သူဌေးအပြင် တခြားလူတွေမှာ ကျွန်မကို အမိန့်ပေးလို့ရလောက်တဲ့ အခွင့်အာဏာတွေ ရှိသွားရောလား ”
“ လုမန် နင်ဘာဖြစ်နေတာလဲ ”
ယဲ့ရွှမ်းရွှမ်း အပြစ်ဝင်ဆိုလေသည်။
“ မမလေးသိုက်က ဧည့်သည်ပါ၊ နင်ဘယ်လိုအချိုးမျိုး ချိုးလိုက်တာလဲ ”
“ ရှင်ပြောသလိုပဲ သူက ဧည့်သည်ဆို၊ ဧည့်သည်ဆိုရင် ဧည့်သည်လို နေရတယ်၊ သူများရုံးခန်းကို ဝင်ပြီး သူများဝန်ထမ်းကို မောင်းထုတ်စရာ အကြောင်း လုံးဝ မရှိဘူး ”
YOU ARE READING
ထိုမှစခဲ့သော အချစ်များစွာသည်
RomanceTranslation of ❛ The Long-awaited Mr. Han『韩先生，情谋已久』❜ written by the author As If Dawn『恍若晨曦』. Story Cover is not mine. Full Credit to relevant Owners. " ခေါ်ထားပါနော် ဘာမဆိုလုပ်ပေးပါ့မယ် " သူမ၏ယခင်ဘဝမှာ သစ္စာဖောက်ကောင်နှင့် ညီမဖြစ်သူ၏ မတရားအမှုဆင်မှ...
