system 091

(4.13)

Unicode

ထိုနေ့ကအဖြစ်အပျက်အပြီးမှာအတော်လေးရှုပ်ရှပ်ခတ်သွားသည်။ချင်းထန်၏မိဘနှစ်ပါးနှင့်ဆရာမလီကသူတို့အုပ်စုပြောသမျှကိုသိပ်မယုံကြည်ချေ။

အဲ့ဒီအတွက်ရှောင်ကျန့်ကအခန်းအတွင်းရှိCCTVကိုစစ်ဆေးကြည့်ရန်အကြံဥာဏ်ပေးလိုက်သည်။CCTVကိုစစ်ဆေးကြည့်လိုက်ရာတွင်ရှောင်ကျန့်တို့အုပ်စုလိမ်နေခြင်းမဟုတ်ကြောင်းကိုသိရှိသွားကြ၏။

ချင်းထန်၏မိဘတွေဟာသူတို့သားလေးရဲ့လုံခြုံရေးအတွက်လွန်စွာစိုးရိမ်ပူပန်ခဲ့ကြသည်။CCTV၏ရလဒ်မှာအတုအယောင်မဟုတ်ပေ။

၎င်းကသဘာဝလွန်ဖြစ်ရပ်ဆိုသည်မှာသိသာလွန်း၏။ပိုင်မင်၊ချင်ဖေးဖေး၊ဝေထန်စီ၊ဝေဝေနှင့်အက်ဒမ်တို့ကသူတို့မိသားစုတွေကိုထိုကိစ္စနဲ့ပတ်သပ်၍အသိမပေးချင်ပေ။ဒါကအန္တရာယ်များလွန်းသလိုတစ်ဖက်မိသားစုကိုအပူတွေလက်ဆင့်ကမ်းပေးသည်နှင့်သာတူသည်။

သိသွားလျှင်တောင်ကူညီနိုင်ပါ့မလားဆိုတာမသေချာဘူးမဟုတ်ပါလား။

ရှောင်ကျန့်ရဲ့သာမန်မဟုတ်သည့်သန်မာမှုကလည်းလူတိုင်းကိုမျက်လုံးပြူးသွားစေနိုင်သည်။ဒီ့အတွက်ဖြေရှင်းချက်ထုတ်ပေးရာတွင်သူ့ရဲ့မကောင်းဆိုးဝါးနှင်သည့်အလုပ်အကိုင်မှာဘူးပေါ်သလိုပေါ်လာသည်။

ရှောင်ကျန့်ရဲ့သန်မာတဲ့တိုက်ခိုက်နိုင်စွမ်းကြောင့်သူ့ကိုဘယ်သူမှသံသယမဝင်ပေ။ဤအတွက်ကြောင့်ရှောင်ကျန့်မှာဘုမသိဘမသိဖြင့်ဇာတ်လိုက်တို့သူငယ်ချင်းအဖွဲ့၏အားကိုးရာထောက်တိုင်ကြီးဖြစ်လာလေတော့သည်။

ဇာတ်လိုက်မယင်းမီကတော့ရှောင်ကျန့်ကိုအနည်းငယ်လန့်ဖြန့်သွားပေမယ့်မူလကတည်းကမုန်းတီးနေသည့်စိတ်အခံကြောင့်တောင်းတောင်းပန်ပန်ဖြင့်အကူအညီတောင်းရန်ပြင်းပြင်းထန်ထန်ကိုငြင်းဆန်သည်။ရှောင်ကျန့်ကလည်းသူ့ကိုကြည့်မရတဲ့သူအားကူညီဖို့ရန်စိတ်အားထက်သန်သည်အထိကိုယ်ကျင့်တရားဖြူစင်လွန်းနေသူလည်းမဟုတ်ပေ။

အရင်ဦးစွာဖြင့်ရှောင်ကျန့်ကကံကောင်းစေသည့်အဆောင်စာရွက်တွေအားရေးဆွဲကာတစ်ယောက်ကိုတစ်ရွက်ပေးသည်။ဇာတ်လိုက်ကသတိလစ်နေခြင်းကြောင့်ဇာတ်လိုက်ရဲ့မိဘတွေကသူတို့သားလေးအစားကံကောင်းစေသည့်အဆောင်စာရွက်ကိုလက်ခံပေးသည်။