system 091

(5.12)

Unicode

ဂူအတွင်းပိုင်းသို့လေးယောက်သားလျှောက်လှမ်းလာခဲ့ကြပြီးရှောင်ကျန့်ကလိုက်လံစူးစမ်းသည်။ကျန်သုံးယောက်လုံးမှာရှောင်ကျန့်ကြောင့်သာလိုက်ပါလာခဲ့ကြတာဖြစ်၍ဘာကြောင့်အထဲဝင်လာမှန်းတောင်မသိကြပေ။

လှိုဏ်ဂူအတွင်းပိုင်းမှာလွန်စွာရှည်လျားလွန်းလှသည်။သူတို့လျှောက်သည်။ဆက်လျှောက်သည်။သို့ပေမယ့်သုံးနာရီကြာအောင်လျှောက်လှမ်းပြီးသည်အထိလမ်းအဆုံးကိုမမြင်တွေ့ရသေးပေ။

သို့သော်လည်းရှောင်ကျန့်ရဲ့ဦးဆောင်မှုနဲ့အတူမည်သူမှညီးညူခြင်းမရှိကြချေ။အတော်လေးကြာအောင်လျှောက်လှမ်းပြီးနောက်တွင်လမ်းခြောက်ခုခွဲနေရာလမ်းကြောင်းကိုရောက်ရှိလာကြသည်။

လမ်းကခြောက်ခုကွဲနေရာမည်သည့်နေရာကိုဝင်သွားရမှန်းမသိကြတော့ပေ။သို့ပေမယ့်လည်းထိုအချိန်လေး၌ရှောင်ကျန့်ဟာရင်းနှီးသည့်ပင်လယ်ရနံ့ကိုခံစားလိုက်ရသည်။ထူးဆန်းစွာပင်ထိုပင်လယ်ရနံ့မှာသူ့စွမ်းအင်နှင့်သဟဇာတရှိနေပြီးလွန်စွာရင်းနှီးနေခဲ့သည်။

ပင်လယ်ရနံ့၏ဦးတည်ရာလမ်းတစ်ခုကိုရွေးချယ်လိုက်ပြီးထပ်မံလျှောက်လာကြပြန်သည်။တစ်နာရီခန့်လျှောက်လှမ်းလာပြီးနောက်တွင်ဂူကြမ်းပြင်တွေမှာတစ်ဝုန်းဝုန်းတုန်ခါလာကြောင်းခံစားမိလိုက်ကြသည်။အရှေ့သို့ပိုတိုးသွားလေပိုမိုတုန်ခါလာလေဖြစ်ပြီးကျင့်ကြံသူတစ်ယောက်တောင်မှမတ်တပ်ရပ်ဖို့ရန်ခက်ခဲလာသည်အထိပင်။

"ဆက်သွားကြရအောင်"

'ချင်း'မျိုးရိုးအမွှာနှစ်ယောက်နှင့်လဲ့ချင်းယန်ကမငြင်းဆန်ကြပေ။သူတို့ကရှောင်ကျန့်ရဲ့စိတ်လှုပ်ရှားမှုကိုသတိထားမိကြသည်။

နောက်ဆုံးမှာတော့သူတို့လေးယောက်ဟာလှိုဏ်ဂူအဆုံးတွင်ကြီးမားကျယ်ပြန့်သည့်လှိုဏ်ခေါင်းကြီးဆီသို့ရောက်ရှိလာကြသည်။

၎င်းကြီးမားလှသည့်လှိုဏ်ခေါင်းကြီးအလည်တွင်တိုက်ခိုက်နေကြသည့်လူသုံးဦးရှိနေခဲ့၏။ထိုသူသုံးဦး၏အရှိန်အဝါမှာလွန်စွာကြောက်မက်ဖွယ်ကောင်းပြီးကောင်းကင်အရောင်ကိုတောင်ပြောင်းလဲသွားစေနိုင်သည်အထိပြင်းထန်သိပ်သည်းသည်။