ဗျူဟာခင်းတဲ့ အမကြီးဇွန်ဘီ (Myanmar Translation)

51

၅၁။ ကမ္ဘာပျက်ခေတ်က ဓားပြများ

"ဘန်း! ဘန်း! ဘန်း!"

ရှဲ့တုန်းက လှုပ်ရှားလိုက်သည့်အခါ အခြားဓားပြများသည် သူတို့၏သေနတ်များကို မြှောက်ကာ သူ့အားဆဲဆိုရင်းပစ်ကြတော့သည်။
"သေချင်နေလား? သေလိုက်တော့"

သို့သော်လည်း သူကကျည်ဆန်များကို ရှောင်ဖို့မကြိုးစားသည်ကို မြင်သည့်အခါ အကုန်ကြောင်အသွားကြသည်။ ထို့နောက် လူဝကြီးကို ခုန်ကျော်လိုက်ကာ လူဝကြီးနောက်တွင် ချက်ချင်းအကာအကွယ်ယူလိုက်သည်။ လူဝကြီးနောက်တွင်နေရင်း သူ့ကိုပစ်သမျှ ကျည်ဆန်တိုင်းကို လျစ်လျူရှုကာ လက်သည်းများကို ထုတ်လိုက်ပြီးနောက် လူဝကြီး၏ ကျောကိုနှိုက်လိုက်သည်။ နောက်တစ်စက္ကန့်အတွင်းတွင် ခုန်နေသည့် နှလုံးတစ်ခုက သူ့လက်ထဲတွင် ပါလာသည်။

လူဝကြီး၏မျက်လုံးသည် ပြူးကျယ်နေကာ ပါးစပ်လည်း အဟောင်းသားဖြစ်နေသည်။ သို့သော်လည်း သူ့အော်သံသည် လည်ချောင်းထဲတွင် ပျောက်သွားကာ မြေပြင်ပေါ်သို့ ဘုန်းခနဲပြုတ်ကျသွားတော့သည်။ ထိုအချိန်တွင် ရှဲ့တုန်းသည် သူ့လက်ထဲက ခုန်နေသည့် နှလုံးကိုကြည့်သာနေကာ ကျန်သည့်ဓားပြများကို ဂရုကိုမစိုက်ပေ။

ဆာလောင်နေသည့် ဓားပြများသည် ရှဲ့တုန်းသည် သူတို့ထက် ပိုဆာလောင်နေကြောင်းကို မသိကြပေ။ သူသည် ဇွန်ဘီအဖြစ်နိုးလာပြီးနောက် အစာမစားရသေးသည်မှာ ရက်အတော်ကြာလေပြီ။ သူသည် အဆင့်နိမ့်ဇွန်ဘီလောက်ပဲရှိသေးသဖြင့် သူ့၏အဆာခံနိုင်မှုသည် တစ်ရက်လောက်သာရှိသည်။ လင်းချင်း၏ ကန်ရေမှအာနိသင်ကြောင့်သာ မဟုတ်လျှင် သူ့စိတ်သည် လွတ်ထွက်သွားကာ ရူးသွပ်နေသည့် ဇွန်ဘီဖြစ်နေလောက်ပြီ။ ဒီလိုသာဖြစ်သွားပါက သူသည်တွေ့သမျှ လူသားတိုင်းကို လူကောင်း လူဆိုးမခွဲနိုင်တော့ဘဲ ကိုက်နေတော့မှာ ဖြစ်သည်။

ရှဲ့တုန်းသည် နှလုံးကိုကိုင်ထားကာ ထိုဆွဲဆောင်မှုရှိသည့်အနံ့ကို ရှုနေရင်း သူ့ကိုယ်သူမနည်းထိန်းနေရသည်။ ဒီလူဝကြီးသည် မကောင်းသည့်သူဖြစ်သော်လည်း လူသားဖြစ်သည်။ ရှဲ့တုန်းသည် အခုဒီနှလုံးကို စားလိုက်ပါက လူသားစားသတ္တဝါဖြစ်သွားမည်မလား? သို့သော်လည်း အခုသူတကယ်ဗိုက်ဆာနေပြီဖြစ်ပြီး ဗိုက်ဟောင်းလောင်းဖြင့် နေရခြင်းက တကယ်အဆင်မပြေပေ။