ဗျူဟာခင်းတဲ့ အမကြီးဇွန်ဘီ (Myanmar Translation)

160

၁၆၀။ လိုက်ခံရခြင်း

လင်းချင်းက တိုက်ဖို့ပြင်ထားသည်ကို မြင်သည့်အခါ ဇွန်ဘီခေါင်းဆောင်သည် လျှပ်စီးလို လင်းချင်းထံသို့ အရှိန်မြှင့်ကာ ပြေးလာသည်။

လင်းချင်းသည် သူမဆီသို့ အမြန်ပြေးလာနေသည့်ဇွန်ဘီကို ကြည့်နေသည်။ လက်သည်းများဖြင့် တိုက်ခိုက်လာသည့်အခါ လင်းချင်းသည် ဒူးကိုကွေးလိုက်ကာ လက်သည်းများကိုမြှောက်လိုက်ရင်း လျှင်မြန်စွာဖြင့် သူမခေါင်းကို ခွဲဖို့လုပ်သည့် ထိုဇွန်ဘီ၏ သံလက်သည်းများကို လျှင်မြန်စွာ ဖမ်းလိုက်သည်။ သူမ၏လက်သည်းများသည် သံဖြင့်လုပ်ထားတာ မဟုတ်သော်လည်း ထိုဇွန်ဘီ၏ လက်သည်းများထက်တော့ ပိုသန်မာသည်။

ဇွန်ဘီ၏လက်သည်းများကိုဖမ်းပြီးသည့်အခါ လင်းချင်းသည် ခါးကိုကွေးလိုက်ကာ ခြေထောက်ကိုအားပြုပြီး ထိုဇွန်ဘီကို ဘေးကိုကိုင်ပေါက်လိုက်သည်။ ထိုဇွန်ဘီသည် လဲကျသွားသည်နှင့် လင်းချင်းသည် သူ့ဗိုက်ကို ခြေထောက်ဖြင့် ကန်တော့သည်။ ထိုဇွန်ဘီသည် အဝေးသို့လွင့်ထွက်သွားသည်။

ကန်ထုတ်လိုက်ပြီးသည်နှင့် လင်းချင်းသည် လျှင်မြန်စွာလိုက်လာသည်။ ဇွန်ဘီက ဘာဖြစ်လဲမသိချင်တွင် လင်းချင်းသည် သူမ၏လက်သည်းများကိုထုတ်ကာယမ်းလိုက်ပြီးပြီ။ ဒီတစ်ခါတော့ သူမ၏လက်သည်းများသည် ကိုယ်ပေါ်ကို ထိခိုက်စေတာ ဖြစ်သည်။

ဇွန်ဘီသည် သူ့ကိုယ်အားသံအလွှာဖြင့် အမြန်မကာနိုင်လိုက်လေရာ လင်းချင်းလက်သည်းမှ လေဓားများဖြင့် ထိသွားသည်။ ဒီတစ်ခါတွင်တော့ ဒဏ်ရာများသည် ပိုနက်လေသည်။ လေဓားများသည် ထက်မြက်သည့်ဓားများလို ဒဏ်ရာပြင်းပြင်းကို ဖြစ်စေသည်။ ဇွန်ဘီသည် ဒဏ်ရာများစွာဖြင့် လဲကျနေတော့သည်။ ပထမတုန်းက လင်းချင်းတိုက်ခိုက်ထားသည့် ပေါင်ကဒဏ်ရာကနေ သွေးအနက်များလည်း ထွက်နေသေးသည်။

"ဂါး. . .ဂါး"

လဲကျနေရာကနေ အသည်းအသန်ပြန်ထကာ အာခေါင်ခြစ်အော်သည်။ သူ့ဒဏ်ရာများကို ချက်ချင်းသံလွှာတစ်ထပ်က အုပ်လိုက်လေရာ သွေးထွက်နေသည်က ရပ်လို့သွားသည်။