ဧကရာဇ်ဗျူဟာ [Di Wang Gong Lue]

အခန်း - ၂၉ (ကောင်လိ၀မ် လာမယ်တဲ့)

[သူ့ညီမကို မင်းနဲ့ပေးစားချင်နေတဲ့
ဟို ကောင်လိ၀မ်ပဲလေ။]

Unicode version :

ရှည်လျားကြာမြင့်လှသော သမိုင်းတစ်လျှောက် ၊ အရပ်ရှစ်ဖြာ ရှစ်မျက်နှာတစ်ခွင် ၊ ခေတ်ကာလအဆက်ဆက်၏ သေနင်္ဂဗျူဟာ စစ်ပညာကျမ်းများတွင် ဤရှစ်ခွင်တိုင်းယန္တရားမှာ လွန်စွာမှအဆင့်အတန်းမြင့်မားလှကြောင်း ​ရေးသားထားကြ၏။ သို့သော် ၎င်းအကြောင်းကို မည်သူကမှ ထဲထဲ၀င်၀င် နှံ့နှံ့စပ်စပ် သိမနေကြ ။ မသိချင် မလေ့လာချင်၍မဟုတ်ဘဲ ၎င်း၏ မှတ်တမ်းမှတ်ရာများကို ရှည်လျားကြာမြင့်လှသော အချိန်ကာလများက ကုန်စင်လွင့်ပါးအောင် တိုက်စားပျောက်ကွယ်စေခဲ့သောကြောင့်ဖြစ်သည်။မှတ်တမ်းတင် ရေးသားထားသမျှ ကျန်ရစ်ထားခဲ့သော စာပေအက္ခရာများမှာလည်း လွန်စွာမှ နည်းပါးလေရာ စုစည်းကြည့်လိုက်လျှင် စာမျက်နှာတစ်ရွက်စာမျှပင်မရှိ။

အဖိုးမုချီ ချက်ချင်း ခေါင်းညိတ်လက်ခံလိုက်သည်။

"ရှစ်ခွင်တိုင်းယန္တရားကွက်....။ ကျွန်တော်မျိုးစမ်းကြည့်ပါ့မယ် ဘုရား"

"အဖိုး တကယ်ရော လုပ်နိုင်မှာလား"

သွမ့်ပိုင်ယွဲ့တကယ်မယုံချင်။ မည်မျှပင် ထူးချွန်ထက်မြက်သော လက်မှုပညာရှင်ဖြစ်လင့်ကစား ယခုကဲ့သို့ စစ်ဘက်ရေးရာနှင့်သက်ဆိုင်သော ယန္တရားများကိုတော့ မကျွမ်းကျင်လောက်ပေ။ နန်းတွင်း၌ နေချင်ရုံသက်သက်ဖြင့် မလိမ့်တပတ် လျှောက်ပြောနေသည်တော့ မဖြစ်နိုင်လောက်ပါဘူးနော်။

"ရှစ်ခွင်တိုင်းယန္တရားကွက်က မူလအစကတည်းက ယန္တရားစက်သာသာပါပဲ။ ဒီလောကမှာ ရှစ်ခွင်တိုင်းယန္တရားအကြောင်းကိုသိတဲ့လူ ဘယ်နှစ်ယောက်ပဲရှိမလဲလို့တွေးကြည့်လိုက်ရင် အဖိုးမုချီတစ်ယောက်တည်းပဲရှိမှာ ကိုယ်တော်စိုးမိတယ်"

"အရှင်မင်းမြတ် ချီးမွမ်းလွန်းနေပါပြီဘုရား၊ ချီးမွမ်းလွန်းနေပါပြီ "

အဖိုးမုချီကို လက်နှစ်ဖက်ကို ပွတ်သီး
ပွတ်သပ်လုပ်ကာ ရှက်နေပြန်၏။

"အကယ်၍များ အဖိုးမုချီသာ ရှစ်ခွင်တိုင်းယန္တရားကွက်ကို ပြန်လည်ဖန်တီးပေးနိုင်မယ်ဆိုရင် ကိုယ်တော် လွန်စွာမှ ကျေးဇူးတင်မိပါမယ်"