ဧကရာဇ်ဗျူဟာ [Di Wang Gong Lue]

အခန်း - ၆၇ (မသေအောင်သာ အရင်ကြိုးစားရမယ်)

[နောက်ပိုင်းကျရင် ထျဲန်းချန်ရှားကို ရှာတွေ့ချင်ရှာတွေ့နိုင်မှာပေါ့]

===============================

တစ်နာရီကြာပြီးသော် ရဲမက်များက အချုပ်ခန်းတစ်ခန်းချင်းစီမှ စာလွှာများကို စုစည်းပြီးဆက်သပေးလာရာ စားပွဲပေါ်တွင် စက္ကူအထပ်လိုက်ကြီးပုံအောနေပေ၏။

သွမ့်ယောင်လည်း ထိုဝန်ခံချက်စာလွှာများကို လိုက်ပါမွှေနှောက်ကြည့်ပြီးနောက် သက်ပြင်းချလာသည်။

"ဒါက ဝန်ခံချက်ရေးနေတာလား၊ ဝတ္ထုရေးနေတာလား"

မည်သို့ပင်ဖတ်ကြည့်ပါစေ၊ လူတိုင်းက တစ်စုံတစ်ခုကို လျှို့ဝှက်ထားသလိုပင်။ ထို့အပြင် ထိုလျှို့ဝှက်ချက်ဆိုသည်ကလည်း မနညးမနော ဖြစ်နေ၏။

"အဘိုးရော ဖတ်ကြည့်ချင်သေးလား"

ချူယွမ်က အဘိုးရွှမ်ထျဲန်းအားမေးလာသည်။ အဘိုးက ခေါင်းခါပြလိုက်ကာ -

"အရှင်မင်းမြတ် ကျွန်တော်မျိုးကို ဖတ်ရှုစေလိုတဲ့စာလွှာတွေကျမှပဲ ဖတ်ပါရစေဘုရား"

အနှီချောင်ယာသားများ၏ စိတ်နေသဘောထားများအတွင်း နက်ရှိုင်းစွာအမြစ်တွယ်နေသော လျှို့ဝှက်ချက်များမှာ ဧကန်ပင် ဆိုးသွမ်းယုတ်မာလောက်သောအကြောင်းများဖြစ်ကြမည်မို့ ဖတ်လိုက်လျှင်လည်း စိတ်နှလုံးကို ညစ်နွမ်းကာ အကုသိုလ်များစေမည်မှာအမှန်။ မဖတ်တာကမှ ပိုကောင်းသေး၏။

သွမ့်ယောင်ကတော့ ဆီမီးတိုင်ကို မိမိအနားတိုးလာလိုက်ကာ ချူယွမ်နှင့်အတူ ထိုစာလွှာများကို ဖတ်နေ၏။ ဖတ်ရင်းဖတ်ရင်း ရယ်ရမလား ငိုရမလားပင်မသိတော့။ တစ်ယောက်သောသူ ရေးထားသောစာကိုသာ ဖတ်ကြည့်ပေတော့၊ သူ့ငှက်ကလေး မပျံနိုင်တော့သည့်(ပန်းသေသည့်)အကြောင်းကို ရေးသားထားသတဲ့။

ဒါမျိုးမှာ လျှို့ဝှက်ချက်ဟုဆိုနိုင်သော်ငြား တခြားမည်သူက ဤလျှို့ဝှက်ချက်မျိုးကို စိတ်ဝင်တစားသိချင်မှာတဲ့လဲ၊ သိလိုက်ရင်ကော တာ့ချူတိုင်းပြည်အတွက် ဘာများ အကျိုးသက်ရောက်မည်တဲ့လဲ။

"ဒီဟာကမှ ကိုယ်တော်သိချင်တဲ့အကြောင်းအရာပဲ"

"ဟင်"