ဧကရာဇ်ဗျူဟာ [Di Wang Gong Lue]

အခန်း- ၄၈ (ကူအဆိပ် ဖယ်ထုတ်ခြင်း)

[ဆန်တောင် မဆေးတတ်ဘူးဆိုတော့ ဘယ်နှယ့်လုပ်ကြမလဲ]

"အရှင်မင်းမြတ်က ကူအဆိပ်သင့်နေတယ် ဟုတ်လား"

နန်မော်ယဲ့ မျက်မှောင်ကြုတ်သွား၏။

"ဟုတ်ကဲ့၊ အဲ့ဒီယွဲ့မင်ကူပိုးကောင်က ဘယ်လိုပိုးကောင်မျိုးလဲဆိုတာ ရှစ်ဖူးသိလား"

သွမ့်ပိုင်ယွဲ့အမေးကို နန်မော်ယဲ့က ခေါင်းညိတ်လိုက်သည်။

"ငါ အရွယ်ကောင်းတုန်းကတော့ တွေ့ဖူးတယ်၊ စိတ်၀င်စားစရာမကောင်းတာနဲ့ ဆက်မမွေးဖြစ်တာ"

"ဒီယာယီနန်းဆောင်၀င်းအတွင်းမှာ အဘိုးအိုတစ်ယောက်ရှိတယ်။ သူက ချောင်ယာလူမျိုးရဲ့ နောက်ကြောင်းတွေ တော်တော်သိထားတယ် ၊ အဲ့ကျွန်းကို ရောက်ဖူးတဲ့ပုံပဲ"

"အိုး ၊ ဒါဆို ဖန်ရှင်းအကြောင်းလည်း သိမှာပေါ့"

သွမ့်ပိုင်ယွဲ့လည်း ခေါင်းညိတ်ထောက်ခံလိုက်သည်။ ထို့နောက် ချူယွမ့်ဘက် တစ်ချက်လှည့်ကြည့်ပြီးခါမှ ဆက်ဆို၏။

"ယွဲ့မင်ကူအဆိပ်ပိုးက ဖန်ရှင်းကို အရောင်လင်းအောင်လုပ်နိုင်တယ်။ ဖန်ရှင်းရဲ့အလင်းရောင်က သမုဒ္ဒရာအောက်ခြေက လန်ဟိုငါးအုပ်စုကို လှုပ်နှိုးနိုင်တယ်။ အဲ့ဒီငါးအုပ်နောက် လိုက်သွားရင် ချောင်ယာလူမျိုးစုတွေ အရမ်းလိုချင်နေကြတဲ့ ရတနာသိုက်ရဲ့ မြေပုံတစ်ခြမ်းကို ရှာတွေ့မယ်"

နန်မော်ယဲ့က ထိုသို့ကြားတော့ နှုတ်ခမ်းဆူကာ ခေါင်းခါရင်း မှတ်ချက်ဆို၏။

"မြေပုံတစ်ခြမ်းစာအတွက်နဲ့ကို ဒီလောက်ထိ မိုက်ရူးရဲဆန်နေကြတာလားဟ"

"ဒီကိစ္စက နောက်မှ ဆက်ပြောမယ်၊ သိပ်လောစရာ မလိုဘူး။ ရှစ်ဖူးက ယွဲ့မင်ကူအဆိပ်ပိုးကို တွေ့ဖူးတယ်ဆိုတော့ အဲ့ကောင်ကို ဘယ်လိုထုတ်ရမယ်ဆိုတာ သိလောက်ပါတယ်နော်"

"ယွဲ့မင်ကူအဆိပ်ပိုးက မင်းရဲ့ရွှေချည်ပိုးကောင်လောက် အန္တရာယ်မများဘူး၊ လူကိုလည်း မထိခိုက်စေဘူး။ မင်းမပြောနဲ့၊ ရှီးနန်စံအိမ်တော်က ဆေးဆရာတောင် အေးဆေး ထုတ်တတ်တယ်ကွ။ ဒါပေမယ့် ဆရာ့မျက်လုံးတွေက မှုန်နေပြီကွာ၊ ဒီကိစ္စကို မင်းကပဲ ဒိုင်ခံ ရှင်းလိုက်တော့"