ဧကရာဇ်ဗျူဟာ [Di Wang Gong Lue]

အခန်း - ၁၁၉ (နန်းဆောင်ဟောင်း)

[အောက်တန်းစားလူယုတ်မာ၏ အောက်တန်းစား အတွေးအကြံများ]

နန်ယန်ပင်လယ်အတွင်းရှိ ကျွန်းစုပြည်ထောင်များထဲတွင် ပိုင်ရှဲန့်ပြည်မှာ ဩဇာအာဏာအကြီးဆုံးပြည်ထောင်ဖြစ်မှန်း သိသာထင်ရှားလှပေသည်။ ထို့အပြင် တည်နေရာမှာလည်း ကူးသန်းဆက်သွယ်ရေးအရ အလွန်အချက်အချာကျသောနေရာဖြစ်သေး၏။ ထိုအကြောင်းကြောင့်ပင် ချူရှိန့်က ပိုင်ရှန့်ပြည်သို့ မကြာခဏဆိုသလို တိတ်တဆိတ် လူလွှတ်စေပြီး အကြိမ်ပေါင်းများစွာ သိမ်းသွင်းစည်းရုံးစေခဲ့သည်။

သို့သော် နာ့ဝါမှာ စိတ်ထားဖြောင့်မတ်သည့်အပြင် တည့်တိုးသာပြောဆိုလုပ်ကိုင်တတ်သောကြောင့်၊ အရာရာကို သတိထားပြီး စေ့စပ်သေချာစွာ လုပ်ဆောင်တတ်သောကြောင့် ဤနန်းကျမင်းသား၏ အကြံအစည်ကမ်းလှမ်းချက်များကို မျက်ကွယ်ပြုလိုက်ကာ ကုန်သွယ်ရေးလမ်းကြောင်းအသစ်တစ်ခုဖွင့်နိုင်ရေးအတွက် ချူယွမ်နှင့် ကောင်းမွန်ခိုင်မြဲသောဆက်ဆံရေးရှိဖို့သာ လိုလားတောင့်တခဲ့သည်။ ထိုအကြောင်းကြောင့်ပင် ချူရှိန့်ဘက်မှ ရောက်လာသမျှ ဧည့်သည်များကို သွယ်ဝိုက်သောနည်းဖြင့် ချော့မော့ပြီး အမြဲ နှင်လွှတ်ခဲ့သည်။ တစ်ဖက်လူက ဘာပေးမည် ညာပေးမည်ဟုဆိုကာ မည်သို့သောလာဘ်လာဘမျိုးဖြင့် ပေးကမ်းလာခဲ့ပါစေ ၊ နာ့ဝါမှာ လုံးဝ စိတ်ဓာတ်ယိုင်နဲ့ခဲ့ခြင်းမရှိ။

သို့သော် နာ့ဝါဘက်က ငြင်းဆန်လိုက်သည်ဆိုပေမင့် နာ့ရှီးရှစ်ကတော့ နောင်တော်ဖြစ်သူနှင့် အတွေးအမြင်ချင်း ကွာခြားသည်။ ညီ​ြဖစ်သူက နဂိုကတည်းကပင် ရည်မှန်းချက်ကြီးမားပြီး လောဘဇောတက်တတ်သောသူဖြစ်သည်မို့ တာ့ချူ၏ ပြည့်စုံကျယ်ဝန်းလှသော နယ်မြေများကို လိုချင်တောင့်တနေသည်မှာ ကြာမြင့်လှပြီဖြစ်၏ ။ချူရှိန့်လည်း ထိုအကြောင်းကို ကြားသိသည်နှင့် ဗျူဟာပြောင်းလိုက်ကာ နာ့ရှီးရှစ်ထံသို့သာ လူစားထိုးပြီး စေလွှတ်ခဲ့သည်။

ထိုအကြောင်းကို နာ့ဝါသိသွားသော် ယမ်းပုံမီးကျ ဒေါသထွက်ကာ နာ့ရှီးရှစ်၏ စံအိမ်အား ရဲမက်များဖြင့် ဝိုင်းဝန်းထားစေ၏။ ထို့အပြင် အပြစ်များကို ပြန်လည်ဆင်ခြင်နေရန်ပါ မှာကြားခဲ့သေးသည်။ သုံးလလွန်သွားတော့ နာ့ရှီးရှစ်သည်လည်း အစ်ကိုဖြစ်သူရှေ့ဒူးထောက်ကာ မျက်ရည်မိုးဖြိုင်ဖြိုင်ကျပြီး အပြစ်ကိုဝန်ခံခဲ့သည်။ သူပုန်တပ်နှင့် ထပ်ပြီးပတ်သက်တော့မည်မဟုတ်ကြောင်းလည်း သစ္စာဆိုခဲ့၏။ မိခင်ဖြစ်သူကပါ ဝိုင်းဝန်းတောင်းပန်လာသောကြောင့် နာ့ဝါလည်း ညီငယ်ဖြစ်သူအား ခွင့်လွှတ်ပေးလိုက်သည်။