ရုပ်ရှင်ဧကရာဇ်၏ သေလမ်းရှာ စေ့စပ်ထားသူလေး [ ဘာသာပြန် ] || Completed ||

Chapter 70

Unicode

ယွမ်မင်ရွှိတစ်ယောက် အရှက်ခွဲခံလိုက်ရသလိုမျိုး ခံစားရသတဲ့၊ ယန်းချင်းချီ စျေးတွေဆစ်နေပြီ
__________________________________

ကိစ္စတွေက ရုတ်တရက်ကြီးဖြစ်သွားတာကြောင့် ဝေ့လန်လည်း တစ်စက္ကန့်လောက် ကြောင်အသွားကာ သတိပြန်ဝင်လာချင်း တခွိခွိဖြင့် ကြိတ်ရယ်တော့သည်။

ယွမ်မင်ရွှိလည်း ငူငူငိုင်ငိုင်လေးဖြင့် မျက်နှာကို ရုတ်တရက်ကြီး ဘာလို့အရိုက်ခံလိုက်ရမှန်း နားမလည်နိုင်ဖြစ်နေသည်။

ယန်းချင်းချီ အမြန်ပြောလာသည်။

''အားနာလိုက်တာ ငါ တမင်ရိုက်လိုက်တာမဟုတ်ပါဘူး '' အားလုံးဝေ့လန်ကြောင့်!

ထိုအခြင်းအရာကိုမြင်တော့ ယွမ်မင်ရွှိပြဿနာရှာလာမှာစိုးတာကြောင့် ဝေ့လန်မတ်မတ်ပြန်ထိုင်လိုက်ကာ ယွမ်မင်ရွှိကိုလှည့်ကြည့်ပြီး

''ဘာမှမဖြစ်ပါဘူး ​ပြိုင်ပွဲပဲဟာ အနည်းအပါးထိခိုက်တာတော့ရှိမှာပေါ့ သူက တမင်လုပ်တာမှမဟုတ်တာ မင်းငါ့ကိုခုနက တမင်မလွှတ်လိုက်သလိုမျိုးလေ ဟုတ်တယ်မလား ''

ယွမ်မင်ရွှိ တစ်ခုခုပြောဖို့ ပါးစပ်ဟလိုက်သော်ငြား ဝေ့လန်ကဆက်ပြောလာသည်။

''မင်း နားလည်ပေးသင့်တာပေါ့ ငါတောင် ခုနက ကိစ္စကို စိတ်ထဲမထားပဲ နားလည်ပေးလိုက်တာပဲဟာ မင်းကငါ့ထက် ပိုကြင်နာတတ်ပြီး ပိုသဘောကောင်းတော့ ဖြည့်တွေးပေးနိုင်မယ်မလား ခေါင်းအုံးရိုက်ပွဲဆိုမှတော့ တယောက်နဲ့တ​ယောက်ရိုက်မိကြတာက သဘာဝပဲလေ မင်းလည်းအဲ့လိုပဲ တွေးမိတယ်မလား ဒါမှမဟုတ် မင်းကိုရိုက်မိပါစေဆိုတဲ့ ရည်ရွယ်ချက်နဲ့ ငါကတမင်ရှောင်လိုက်တယ်လို့ ထင်နေတာလား''

ယွမ်မင်ရွှိ သူ မတရားခံနေရတာကို သိသော်ငြား ဘာမှပြန်မပြောရဲသဖြင့် အသံတိုးလေးနှင့်သာ ''မထင်ပါဘူး '' ဟု မဖြေချင့်ဖြေချင် ပြန်ဖြေလိုက်ရသည်။

''တိုက်ဆိုင်လိုက်တာ ငါလည်းမထင်ဘူး '' ဝေ့လန် သူ့လက်ထဲက ခေါင်းအုံးကိုမြှောက်ကာ ယန်းချင်းချီဘက်ပြန်လှည့်သွားပြီး ''လာ ဆက်ရိုက်ရအောင်! ''